Святой источник
    Вход Регистрация

Упоминание в летописях Пискаревских о Владимирской иконе Божией Матери

Автор: Плаксин Олег
Опубликовано: 3-09-2008, 19:39, посмотрело: 2799
Божия Матерь

Упоминание в летописях Пискаревских о Владимирской иконе Божией Матери

О приходе Темир-Аксаце.
В лето 6903, в великое княженье благочестиваго и христолюбиваго великаго князя Василия Дмитреевича, воста некий безбожный царь, именем Темир-Аксак, с восточный страны от Синия орды, от Шамахейския земли, и велику брань сотвори, и много мятеж воздвиже в Орде и на Руси приходом своим. Сей бо царь Темир-Аксак многи брани воздвиже, и многи сечи показа, и многи победы учини, многим полком сопротивным одоле, и многи гроды [раскопа], многи люди погуби, и многи страны и земли повоева, многи области язык плени, многи царьства и княжения покори под себе. А се имена тем землям и царьством, их же попленил Темир-Аксак: Чагадае, Хорусане, Голустния, Китай, Синяя орда, Ширязы, Испагань, Орначь, Гилян, Сиз, Шибран, Шамахи, Савас, Арзунум, Тефлизи, Тевризи, Гурзустани, Обези, Гурзии-Багдаты, Темирькабы, рекше Железная врата, и Асирию и Вавилонское царьство, иде же Нов, ходоносор был, иже Иеросалим пленил и трех отроков, и Севастию, иде же мучены 40 мученик, и Армению Великую, иде же был Григорей епископ, и Дамаск Великий, и Сарай Великий. Со всех сих земель Темир-Аксак дани и оброки имаши, и на войну ходят с ним. И со всех сих стран собрав тмочисленныя полки и прииде со многою силою на царя Тахтамыша, и бывшу бои межи ими и одоле Темир-Аксак, а Тахтамышь побеже.

И оттоле восхотев Темир-Аксак итти на Рускую землю, християн воевати. И пройде всю землю татарскую, и приде близ предел Рязанския земли, и взя град Елец и князя елецкаго изнима, и многи люди помучи, поиде же паки на Рускую землю. Се же слышав князь Василей Дмитреевичь, собра воя многи, поиде с Москвы х Коломне, хотя итти противу его. И пришед ста на березе у Оки реки, а Темир-Аксаку стоящу на едином месте две недели, не поступя ни семо, ни овамо. Граду же Москве пребывающу во смущении и готовящуся сидети в осаде, и многу народу сущу в нем отовсюду собравшуся, по вся же дни частым вестем приходящим на Москву возвещающу прещение грозы Темир-Аксаковыи, како готовится воевати Рускую землю и како похваляется ити к Москве, хотя взяти ю и люди руския попленити и места святая разорити, а веру християнскую искоренити, а християн томи[ти и] гонити и мучити, пещи и жещи, и мечи сещи. И бяше сий Темир-Аксак вельми нежалостив и земло немилостив, и лют мучитель, и зол гонитель, и жесток томитель, воздвизая гонение на християны, яко же древний зловернии цареве перви мучители на християны, яко же Иулиян Законопреступник и Диоклитиян, и Максимьян, и Декий, и Ликиний, и прочий мучители. Тако же и сий Тимир-Аксак мучительский хваляся, хотя воздвигнути гонение великое на християны. И сия же грозныя и страшныя вести слышаще вельми в печали быша народи християнстии и [с] воздыханиями и со слезами моляхуся богу, дабы избавил от таковыя беды и скорби. Кипреян же митрополит заповеда тогда всем людем поститися и молитися, и молебны пети. И всии народи християнстии с радостию и со тщением и со усердием многом и верою твориша пост и молитву, покаяние и слезы и обеты, кто же по своей силе, от мала и до велика их, молящися богу и пречистей его матери.

Князь же великий Василей Дмитреевичь и митрополит Кипреян, и прочий князи, братия великого князя, умыслиша совет благ, да принесут чудотворную икону пречистыя богоматере из града Владимеря во град свой Москву, глаголюще сице: “Никто же нас может избавити от нужи сия и пе|л. 402|чали, развее владычице нашей богородицы и приснодевы Мария, та бо преложит печаль нашу на радость, та бо есть заступница наша и града нашего и всякого града и стран и всего рода человеческаго, иде же с верою призывают ея на помощь. Сия бо избавляет вся християны от глада и от пагубы, от труса и от потопа, и от огня и меча, и от нахождения поганых и от [на]падения иноплеменник, и от нашествия ратных и от межиусобныя брани, и от напрасныя смерти и от всякого зла находяшаго на нас. Но точию с верою призовем имя ея на помощь и со усердием помолимся ей и не погрешим прошения нашего”. И яко умыслиша, сице и сотвориша, и послаша по чюдную ону икону пречистыя богородицы в славный стольный град Володимер. Сим же тако бываемом, пришедше же они послании и повелеша свещенником церкви оноя Владимерския пения молебная совершати пред образом богоматере. И на мнозе молившеся со слезами, и по сем приступлыне свещенницы и взяша ис киота пречюдную и чюдотворную икону пречистыя богородица и понесоша ю от града Владимера ко предреченному граду Москве, страха ради окаянных агарян и нахождения ради безбожнаго Темир- Аксака, его же иногда под востоком солнычнымслышахом [далека суща], ныне жь близ дверей приготовился ес[т]ь, и готовится, и поощряется, и вооружается на ны зело. Проводиша же пречестныя икону из града Владимеря в самый празник успения ея со кресты и кандилы всии священницы и весь народ града того, малии и велицыи, юнии и старии, мужы и жены, и отроковицы, и младенцы, и ссуще[и] млеко на руках м[а]т[е]рей своих, со слезами многими, далече шествие творяше, не могуще отлучитися таковаго утешения и заступления и скорый помощи и надежи. И тако многи слезы излиявше и велико рыдание сотворше, и много моление принесше и со страхом и с трепетом многим облобызавше всии народи они образ пречистые богородицы, и возвратишася во град свой Володимер. Егда же приидоша близ града Москвы со пречюдною иконою пречистый богоматере, тогда изыде весь град в стретения ея, митрополит Кипреян со кресты [и] иконами, и с кандилы, и епископи с ним и архимондриты, и игумены, [и] иереи, и дияконы со псалмы и песньми и с молебными правилы, по них князи и бояре, княгини и боярони, мужи и жены, и юноши и девы, и старцы со уношами, отроцы и младенцы, сироты и вдовицы, нищий и убозии, иноцы и иноки не, и всяк возраст мужеска полу и женска, от мала и до велика. Все множество безчисленно народа християнского сретоша ю далече за градом на поли. И яко узреша чюдный образ предреченныя иконы пречистые богоматери, и тако всии падоша на земли со многими слезами, молящеся и воздыхающе из глубины сердца.

И тако на мнозе благодаривше ея и воставше от земля, руце воздевше на высоту, вопиюще и глаголюще: “О всесвятая владычице богородице, избави нас от нахожения безбожных агарян, хвалящихся достояние твое разорити. Защити князя и люди от всякого зла, заступи град сей и всякий град и страну, в них же прославляется имя сына твоего и бога нашего и твое. Избави нас от нахожения иноплеменник, от поганых пленения, от огня и меча их, и от напраснаго убиения, и от обдержащия нас скорби, и от печали, нашедшея на нас, и от настоящаго гнева, беды и нужа премени и от всех сих предлежащих нам искушений пришествием своим к нам и благоприятными молитвами к сыну своему и богу нашему свободи. О пресвятая госпоже владычице богородице, умилосердися на нищая и убогая и скорбящия люди твоя, на тя бо надеющеся не погибнем, но избудем тобою от враг наших. Не предай же нас, заступница наша и надежда наша, ненавидящим нас, но советы их разори и козни их раздруши и во время скорби сея нашедшая на нас, буди нам, теплая заступница и скорая помочница, и предстательница, да избывше от всех злых находящих на нас, благодарне ти возопием: “Радуйся, заступнице, християном и покрове граду нашему”. И тако на мнозе благодарение воздавше, и поидоша во град со иконою богоматере. И принесше, поставиша ю в соборной церкви пречистыя богородицы честнаго Успения ея на десней стране, иде же [и до]ныне стоит, заступающи и сохраняющи град сей и вся християны от великия напасти, приходящая на нас грех ради наших. Бы[сть] же тогда ново и преславно чюдо, паче надежа нашея, и превелико удивление, и многое милосердие владычне и пречистыя его матере преславныя вла-дычице нашея богородица и приснодевы Мария на роде християнстем.

В день бо той [и] час, в он же принесена бысть чюдотворная богородицы икона от града Владимеря к славному сему граду нашему, и во время оно, в не же изыде все множество християнского народа на сретение пресвятыя богородица, и возопиша со слезами молящись ей, просящи помощи от нея и заступления от поганых нашествия, поведаху же сице бывшей тогда у оного поганаго царя, яко в день той [и] час, гордый он и суровы[й и] бесчеловеческий, да сице реку, не имы[й] вида человеча, но весь мерзок и безобразен и немилостивы[й], иже от Огары от рода Темирь, ижь преже зело убо дыша, зело же хвалясь на християны, на овца Христовыя паствы, паче же на самое Христово имя, ныне жь паки убояся и устрашися зело, и смятеся умом, и ужасеся душею, объяти и страх и трепет, и мнети ему, яко некоему многу воинству градущу на нь от Руския земли, и вскоре возвратися, отнюду же прииде и вборзе к путному шествию устремись, и быстр[о] идяше, яко некому гонящу по нем, но по истинне гоним бяше силою божиею и помощию и заступлением пречистыя владычица нашея богородици приснодевы Мария, крепкия во бранех християнскому роду помочницы.

Сице бо есть милосердие божие и пречистые его матере на нас грешных и сица победа ея на противный, и сице одоления на безбожныя. Не видеша бо полков наших и не слышаша руских князей и со воинствы грядущих на них, ни гласа труб их, но толико возопиша християне в печали сердца своего и призваша бога на помочь и пречистую его матерь, и в той час безбожный со бегом к Орде возвратишася, гоними гневом божиим. И тако сеть его сокрушися, и мы избавлени быхом, помощь наша от господа, сотворшаго небо и землю. Слышав же благоверный великий князь Василей Дмитреевичь и вси князи рустии и все православное воинство их, яко и[же] преже хваляися безбожный Темир-Аксак потребити християнство и разорити святыя церкви, и положити всю землю рускую пусту и огнем пожещи, се же невидимо побежен бысть и прогнан от вседержительныя руки всевидца бога. И о сем велико благодарение воздаша богу и пречистей его матери о преславном ея чюдеси, бывшем на нас грешных. По сем же Кипреян митрополит совет сице совещает и глаголет тако великому князю: “Не подобаше, о сыну, забвение быти толицей и божией милости и помощи святыя богородици и заступления на роде человечестем, да не оставит без праздника бывшее сие преславное чюдо богоматере пред очима нашима”. И вскоре повелеша на том месте церковь поставите, иде же сретоша чюдотворную икону святыя богородица, на воспоминание бывшаго ея чюдеси и великих благодеяний божиих, бывших на нас, недостойных рабех его. И устроена же бысть церкви та и украшена иконами и книгами, и тако свяща ея сам митрополит во имя святыя богородица, чеснаго ея Сретения. И оттоле уставися таковый праздник празновати месяца августа в 26 день в честь и в славу пречистые владычица наша богородица и приснодевы Мария; есть и до ныне церковь та и монастырь около ей устроен в славу Христу богу нашему.






Основан в 2008 году