Регистрация

Акафист преподобному Варнаве Гефсиманскому

Автор: Плаксин Олег
Опубликовано: 26-08-2009, 22:47, посмотрело: 4485
Преподобные

Акафист преподобному Варнаве Гефсиманскому

Кондак 1

От утробы матерней предъизбранный на служение Христу Богу, отроком зрел еси Его и Ангельскаго посещения сподобился еси; к Преподобному Сергию в юности притекл еси и шед от силы в силу совершенную основал еси обитель монашескую на Выксе-реце; луче Гефсиманскаго скита, отче Варнаво, достигл еси вечныя обители, идеже пребываеши и молишися непрестанно о душах наших, поющих ти:
Радуйся, преподобне Варнаво, монахов наставниче, мирских напутие, верных утешение.

Икос 1

Нищетою духовною стяжал еси благодать подавати многоцелебные плоды страждущим телесно и духовно, сего ради молитвами твоими укрепляеми взываем ти:
Радуйся, не токмо хлебом, но паче духом питателю.
Радуйся, не умеющим нам самим себе помощи, помогаяй.
Радуйся, паче нас слышащий нежели мы призывати умеем тя.
Радуйся, яко из Горняго Мира старцами-наставниками бе укрепляемь, тако и нас ныне заступаяй.
Радуйся, вездеприсутствие Божие на всяк час во уме своем имевый.
Радуйся, жизнь свою спасению других посвятивый.
Радуйся, презревый всякое плотское упокоение.
Радуйся, умертвивый духом всякую страсть.
Радуйся, возлюбльший нищету духовную со всяким смирением ради Господа.
Радуйся, благодаривый Господа, идеже мы ропщем.
Радуйся, греха непричастный, причастник славы Небесной.
Радуйся, лампада жизни монашеской.
Радуйся, преподобне Варнаво, монахов наставниче, мирских напутие, верных утешение.


Кондак 2

Приявши телесное и добре воспитанный родителями твоими Илией и Дарией на жизнь земную временную, сторицею воздал еси духовное, по прошествии же многих лет во инокини обители тобою созданной постригл еси матерь свою, напутствовав в радость жизни вечной, идеже со Ангелы вопиет есть Богу: Аллилуиа.

Икос 2

На свой путь подает Господь силы, рекл еси, отче Варнаво, да исполним малое в подвизе, ниже в гордости возжелаем большаго самоизвольнаго креста и чуждаго дела. Тако поучаеми взываем ко наставнику предоброму:
Радуйся, самоотвержение и смиренномудрие имея себе вспоможением,
Радуйся, с пути неправеднаго на путь правый наставляяй.
Радуйся, ниже премудростию высокой, обаче простотою сердечной человеков от грехов изимаяй.
Радуйся, греховных недуг исцеляяй верою притекающих тебе.
Радуйся, из рук смертных таскаяй человеков на жизнь вечную.
Радуйся, молитвами тебе ко Господу приближающий нас.
Радуйся, обличителю смелых в нанесении скорбей, малодушных в пренесении я,
Радуйся, исправителю непослушных, исполняющих послушание, аще предваряет е своеволие,
Радуйся, истине наставляяй стоящих на своем и к другим неуступчивым,
Радуйся, недуг смущения человеков чрез кротость побеждавый,
Радуйся, благодушествуемый в терпении,
Радуйся, вознесыйся по смирении,
Радуйся, преподобне Варнаво, монахов наставниче, мирских напутие, верных утешение.


Кондак 3

В простоте сердца проходил еси безпреткновенно вся скорбныя наветы лукаваго, помози и нам дмению чуждым быти, яко преити нам в час смертный испытаний последних край, да не возмется от нас, еже мним имети и вкупе с тобою воспоем на небесех: Аллилуия.

Икос 3

Узким путем утеснения плоти шествовал еси, почитая недозревшим плодом себя, чрез томление чрева, всеночное стояние, воду в меру, хлеб в скудости, очистительное питие безчестия, насмешки, поругания, отсечение своей воли, терпение нападков, безропотное переношение небрежения, вменение ни во что оскорблений, и навык, егда обижают не сердитися, егда унижают не гневатися, егда осуждают смирятися, пременил ся во зрел плод. Темже и образ действовати указал и нам, благодарно хвалящих тя:
Радуйся, томлением чрева напитавый душу щедрыми плодами благодати,
Радуйся, подкреплявыйся паче Тайнами Христовыми, нежели пищей тленной,
Радуйся, питием безчестия очищение приявый,
Радуйся, претерпением насмешек и заушений в радость Господа восшедый,
Радуйся, временныя поругания в вечную хвалу претворивый,
Радуйся, от трудов попечительных снести свой хлеб забываяй,
Радуйся, небрежения безропотным переношением великаго промышления о тебе Господа приявый,
Радуйся, ни во что оскорбления вменивый,
Радуйся, уныние пренесением обид победивый,
Радуйся, всеночными стояниями всевечный покой достигнувый,
Радуйся, пренесением унижения безгневие стяжавый,
Радуйся, в нечестии осуждения тя златой плод смирения ископавый,
Радуйся, преподобне Варнаво, монахов наставниче, мирских напутие, верных утешение.


Кондак 4

Бурю искушений имевшую приити на тя в многотрудном житии твоем победил еси упованием Божиим и твоих старцев-наставников заступлением укрепляемый, подвизаеши и нас уповати ниже на свои немощныя силы, но паче на Божие, всех святых и твое заступление, вопия: Аллилуия.

Икос 4

Вся скорби со всяческим смирением учил переносити, образом Иова, плачущаго на гноищи, Предтечи, алчущаго в пустыни, Петра, распятаго на кресте, Самой Преблагословенной Матери Спаса нашего при Кресте Божественнаго Сына, темже наставнику нашему поим:
Радуйся, бедствия привременныя в радость вечную претворивый,
Радуйся, аще страдавый телом, ныне духом упокоеваемый,
Радуйся, горьким лекарствм скорбей грехи и немощи целити призываяй,
Радуйся, многих напастей претерпением в Царствие Божие вшедый,
Радуйся, страдавый по времени, ныне выну блаженствующий,
Радуйся, образом смирения и нам благой пример явивый,
Радуйся, неотступно просивый благая у Господа и просимое получивый,
Радуйся, всем взаимнаго мира и любви желавый,
Радуйся, небесный благожелатель нашего спасения,
Радуйся, плакати о гресех, доколе время есть и жизнь не пресеклася учивый,
Радуйся, не престающих от грехов и льстящих милости удостоитися, яко прелести бесовской обличителю,
Радуйся, скорби, тесноту, всякую болезнь и злострадания в благодарности встречавый,
Радуйся, преподобне Варнаво, монахов наставниче, мирских напутие, верных утешение.


Кондак 5

Краткое время делания и искуса со всяким благоугождением Господу провел еси, сохранив чистоту и целомудрие в отрицании всякаго греха мыслию и делом. И рекл еси: «Не смерть бо, но грех разлучает нашу душу с Богом». Сего ради на небесех выну воспеваеши Ему: Аллилуия.

Икос 5

На месте, среди идольскаго мрака, святым нареченнем и чудесно посещеннем иконой Оранской Божией Матери, основал еси обитель Иверскую и удостоверенный утешительным посещением Божиим во устранение сомнений, извел еси благая от недостоинства раскола, да и мы с сестрами-будильщицами сей обители воскликнем: «Православные вставайте! Бдению настало время и молитве час!». Виновнику же сего возопиим:
Радуйся, яркий свет истины посреде полнаго мрака раскола возжегший,
Радуйся, заблуждшим людем сим светильником, путь указующий,
Радуйся, многотрудную жизнь во обители, яко в раи, соблюдением заповедей Божиих соделавый,
Радуйся, внятному, неспешному и истовому чтению и пению в ней насадителю,
Радуйся, отче спасительный чадом твоим верным,
Радуйся, наблюдатель строгий монастырскаго устава,
Радуйся, нападков терпением нападения бесов помогаяющий отражати чадом твоим,
Радуйся, никогоже чад твоих небрежением презревый,
Радуйся, трудолюбче Христов, «для монаха праздника нет», рекий,
Радуйся, полунощней молитве, яко наипаче благодатней, поучавый.
Радуйся, блаженную кончину исповедуя чад твоих, во олтаре приявый,
Радуйся, сеявый в горестех, возрастивый в сладости,
Радуйся, преподобне Варнаво, монахов наставниче, мирских напутие, верных утешение.


Кондак 6

Умерщвлением греховным приношаем Ти страдания, Христе, яко гвоздие в Твоя раны вонзаеми, но молитвами отца нашего Варнавы утверди в нас гвоздь веры, еже от всех скорбей и бед привременных крепчае пригвождает душы наша ко кресту Твоему, вопиющих Ти: Аллилуиа.

Икос 6

По малу восходя на высоту преспеяния достигл еси вершин небесных, будучи нам образом постепеннаго делания, да не взявшись за многое посмеваемы будем от враг бесплотных за нетерпение, но имея тя заступника, отче Варнаво, возопиим ти:
Радуйся, непосильных подвигов, яко понуждений вражиих обличителю,
Радуйся, путем искушений достигший спасения,
Радуйся, сердечные помышления людские прозреваяй.
Радуйся, отсекати житейские страсти и навыки терпением научаяй,
Радуйся, от всякия лукавыя вещи огребавыйся,
Радуйся, в страданиих умертвивший страсти телесныя,
Радуйся, смирением и любовию поборавший страсти душевныя,
Радуйся, памятию смертною враги побеждавый,
Радуйся, на всяк день и ночь призывавый испытати душу свою,
Радуйся, воздаваяй хвалу Господу за вся,
Радуйся, к покаянию аки ко врачевству от греха прибегати призываяй,
Радуйся, нищетою духовною притекающих к тебе насыщаяй,
Радуйся, преподобне Варнаво, монахов наставниче, мирских напутие, верных утешение.


Кондак 7

Видехом Свет Истинный непщевани быша во свете, но всегдашним преклонением ко греху растеряли спасительную благодать, во мраце неведения водворились есте. Помози нам Господи, всегда зрети Свет Твой, попаляяй греси наша, да взываем вкупе с молитвенником о нас крепким, отцем Варнавой: Аллилуия.

Икос 7

Аще царские брашна низводят долу дух наш, земное же ядие удобее дух горе возводит, паче же удалением злаго плод содевает зрел поста. Сего ради поучениями сими возгреваеми возопием Варнаве, преподобному отцу нашему:
Радуйся, постивыйся телесне, прилагавый к сему и духовный сердца плод,
Радуйся, не хлебом, но паче правдою Божией питавыйся,
Радуйся, постом удалятися зовый не токмо злых дел, но мыслей неподобных и слов праздных,
Радуйся, не уподоблению, но поучениям Святых Отцев, яко млечной пище паче твердой призывавый,
Радуйся, труд молитвы в наслаждение претворивый,
Радуйся, чрез любовь к ближним сердечныя очи отверсты выну имевый,
Радуйся, слезами сердечнаго покаяния недостающее правых дел восполняти советовавый,
Радуйся, покаяния плачем утешения дар получивый,
Радуйся, яко тем даром добрым вполне другим послуживый,
Радуйся, благоугодивый Господу жертвами духовными – верою, надеждею, любовию,
Радуйся, рекий: «праведника нет единаго на земле, все грешники пред Богом оправдываются туне, благодатию Господа Иисуса Христа»,
Радуйся, человекоугодия приклоньшихся строгий исправителю,
Радуйся, преподобне Варнаво, монахов наставниче, мирских напутие, верных утешение.


Кондак 8

Время покаяния скорой жизни нашей, яко молния проходит и не возвращается, но ради Господа да сотворим труды и спасет тем души наша. Тако научал еси, преподобне отче, да и нам, творя тако, воспети с тобою на небесех: Аллилуиа.

Икос 8

Поучал еси нас, яко совести гласу, обличающу нас всяко внимать следует: сей бо есть глас неба к нашему исправлению взывающий. Но аще пробуждаются в нас мир и радость и святыя помышления, да познаем ктому: сие бо суть к точному исполнению заповедей Божиих, еже творил по всяк день и час, сего ради поем ти:
Радуйся, указующий верные пути нам, коемуждо словом, коемуждо жизнию своею,
Радуйся, начальных к царскому пути приуготовляяй,
Радуйся, внушениям доброй совести следовавый,
Радуйся, обаче «старец-простец» прозванный, но духом в превыспренняя проницаяй,
Радуйся, от злых бесед отвращавыйся,
Радуйся, праздность трудолюбием отгонявый,
Радуйся, облистаемый светом Христовым,
Радуйся, не точию слышатель, но заповедей Божиих делателю усердный,
Радуйся, молитвы наша преносяй ко Господу,
Радуйся, время благоприятное ко спасению употребивый,
Радуйся, от скверн греховных вполне душу очистивый,
Радуйся, сквозе тесныя врата прошедый,
Радуйся, преподобне Варнаво, монахов наставниче, мирских напутие, верных утешение.


Кондак 9

Любы Божия вся побеждает, и время, и смерти преграду, сего ради на покров любве твоея надеемся, преподобне отче Варнаво, яко возгреваеми ею убежим маловерия, возставляеми тобою Богу нашему пети: Аллилуиа.

Икос 9

Верные ученицы твои, вкупе со святыми Царственными мученицами и всеми новомучениками Росийскими, напутием твоим претерпеша годину богоборческих испытаний, овы мученицы, овы старцы явистеся, ныне славы небесной сподобистеся, сего ради мы причастия награды получити за их подвиг, надежду имамы, яко и ты рекл еси: «Пред концем рассвет будет», взываем ти:
Радуйся, надежду безнадеждным возвращаяй.
Радуйся, всяцей маловажней немощи, яко от Бога удаляющей, противниче,
Радуйся, чад твоих жизнями достойными познанный.
Радуйся, двумя крилами: послушанием и смирением к Богу возлетевый,
Радуйся, присносущнаго света сияние,
Радуйся, отщетивый душу свою ради Господа,
Радуйся, яко свою волю на Божию пременивый,
Радуйся, со страстьми и похотьми плоть распявый,
Радуйся, ниже своих, но паче святых отец предлагавый поучений,
Радуйся, яко вкупе с ними ныне наставником нам являешися,
Радуйся, алкавый прежде правды Божией, ныне насытивыйся и других насыщаяй,
Радуйся, смирения певец пресладкий,
Радуйся, преподобне Варнаво, монахов наставниче, мирских напутие, верных утешение.


Кондак 10

Егда отречемся себя, тогда по явлению действуемаго Духа Святаго, познати сможем истинное естество наше, еже на тебе, отче Варнаво, зримо видехом исполньшеся, и да возопиим Царю царствующих: Аллилуиа.

Икос 10

Разбойника, страстию пиянства уязвляема, имущаго помышление убити тя, простил еси и предстательством за него на судищи избавил еси от уз, тако и нас, страстям подклонившихся заступи в час кончины нашея, вопиющих ти:
Радуйся, всякаго зла не убоявыйся,
Радуйся, на Господа вся печали своя возверзавый,
Радуйся, всепрощением Божие прощение приявый,
Радуйся, злое на доброе прелагавый,
Радуйся, хвалы Богу возносяй, сего ради похваляемый ныне многими,
Радуйся, невидимое земному естеству, яко небожитель видящий,
Радуйся, добра бегающих и чрез сие в беды впадающих, терпеливый наставниче,
Радуйся, всуе рыдающих к исцеляющему покаянию наставляяй,
Радуйся, благоуханный цвете луга духовнаго,
Радуйся, волю Господню познавый,
Радуйся, во всякое время поучавыйся в ней,
Радуйся, чистый сердцем, тайнозритель славы Господней,
Радуйся, преподобне Варнаво, монахов наставниче, мирских напутие, верных утешение.


Кондак 11

Не умеет ум человеческий познати тайны Божии и чудеса, являемии чрез святых Своих, но удобее нам воспевати в простоте сердечней, тебе подобно, отче Варнаво, ниже испытати судьбы Господни в мудрованиях плотских, но пети Ему: Аллилуиа.

Икос 11

Егда полвека монашества твои чада справляху, рекл еси «Я сам – ничто. Вся суть от Бога», и просил я токмо о молитвах. Сего ради ныне в светлостех Божиих пребывая, моли о нас Всемилостиваго Бога, улучити нам Царствие Небесное вопиющих ти:
Радуйся, молитвою непрестанною, греха избегнувый.
Радуйся, последняя своя поминаяй и чад своих сему призываяй.
Радуйся, неопустительно храм Божий посещати учяй.
Радуйся, довольный малым и скудным, считая себя и того недостойным,
Радуйся, от суемудрия гордаго отвращаяй.
Радуйся, разумением духовный плод к укреплению других стяжавый,
Радуйся, яко богатиши нас от славы твоея небесныя,
Радуйся, трудом и испытанием себя на всяк день очищавый,
Радуйся, всякаго к тебе притекающаго без различия лица утешавый,
Радуйся, на последнее место текий, ныне в первых на пиру Господнем преседяй,
Радуйся, овец твоих истины уклоньшихся добрый пастырю,
Радуйся, почитаяй себя низшим всех, ныне обитаяй в превысших селениих,
Радуйся, преподобне Варнаво, монахов наставниче, мирских напутие, верных утешение.


Кондак 12

К небесней славе, явльшейся в тебе, присовокупил еси земную, егда прославлен был еси посреде Радонежских Святых в день соборный. С ними же вкупе поминаеши ныне нас и вопиеши на небесех Триединому Богу: Аллилуиа.

Икос 12

Преподобне отче Варнаво, яко прешедый путь земной со всяким терпением и достигнувый славы небесной, имеющий власть и другим помощи, помози нам с надеждою и любовию к тебе притекающим преити сей путь искушений, имея тебе образ благодатный пред собою, да вопием ти:
Радуйся, во благих селениях ныне живый о нас пекущийся,
Радуйся, ангела своего радовый на всякое время,
Радуйся, не прелагавый сердца к текущим богатствам мирским, ниже духовным,
Радуйся, задняя прежних подвигов забываяй,
Радуйся, многим нуждением венец нетленный от Господа получивый,
Радуйся, избранниче Божий, во олтаре церковнем кончину восприявый,
Радуйся, разговоров праздных бегаяй,
Радуйся, всякое самолюбие и зависть отбросивый,
Радуйся, ниже словесное, обаче сердечное смирение стяжавый,
Радуйся, служивый Единому Богу и других тому научавый,
Радуйся, со усердием в передняя простираяйся,
Радуйся, почести вышняго звания Божия достигший,
Радуйся, преподобне Варнаво, монахов наставниче, мирских напутие, верных утешение.


Кондак 13

Приношая малое моление сие наше, радуйся, взываем ти, преподобне отче Варнаво, благовествуяй бо лето Господне приятно, деющи учил еси чистым сердцем вопити ко Царю Светов, подателю жизни нашея и избавителю от власти мрачнаго миродержца, песнь сладчайшую: Аллилуиа.

Этот кондак читается трижды, затем икос 1-й и кондак 1-й.



Величание
Ублажаем тя, преподобне отче Варнаво, и чтим святую память твою, наставниче монахов и собеседниче Ангелов.



Молитва

О преподобне отче Варнаво, пастырю наш кроткий и утешительный, милостивный помощниче и теплый о нас молитвенниче! Ты измлада чадо благословения Божия быв, образ послушания родителем, повиновения господем и служения ближним показал еси. Заповеди Господни возлюбив, в Лавру Преподобнаго Сергия притекл еси и того верный ученик явился еси. Во обители же Божия Матере повелением настоятеля аввы Антония пребывая, дух смиренномудрия, кротости и терпения стяжал еси и дар рассуждения и прозрения помышлений душевных от Бога приял еси. Сего ради монашествующим духовный наставник, инокинем созидатель обители Иверския на Выксе-реце и всем страждущим и болезнующим целитель и попечитель милостивый даже до часа смертнаго был еси. По преставлении же твоем Бог многия милости почитающим память твою яви и иноком учителя тя верна дарова.
Темже молим тя, праведный отче, якоже и прежде ходатайствуй пред Богом молитвами твоими всем людем во всяцем звании дух утешительный стяжати и коемуждо потребная обрести: юным послушание и целомудрие страхом Божиим сохранити; в возрасте сущим – любовь Божию и согласие стяжати; алчущим – не токмо хлебом насущным, но и наипаче словом Божиим насытитися; плачущим – утешитися; изгнанником и странником – пристанище обрести; в темнице сущим – от уз свободитися; благочестивым – в Дусе Божием возрастати и смиренномудрия достигнути. Сшествуй нам во всех путех жизни нашея, паче же умоли Господа нашего о прощении прегрешений и неправд наших и к свету заповедей Божиих стопы наши направи, да единым сердцем и усты славим Пресвятую Троицу, Отца и Сына и Святаго Духа во веки веков. Аминь.


Тропарь, глас 5

Измлада Христа Бога чисте возлюбив, / сын утешения был еси, / преподобне отче Варнаво. / По имени и житие твое бысть: / коемуждо страждущему, и нищу, и царю / пастырь кроток, утешитель и целитель явился еси. / Поминай нас, благодатный отче, / да молитвами теплыми твоими / Жизнодавец Бог дарует нам / утешение и велию милость..


Кондак, глас 2

Печальнику земли Российския Преподобному Сергию от юности последовал еси, святе Варнаво, / и завет старца твоего, сице рекшаго: / «Тако хощет Бог: / словом и хлебом питай алчущих», - поистине до конца исполнил еси. / Сего ради и ныне молим тя, / не остави нас, утешительный отче, / небесною любовию твоею.


День памяти преподобного Варнавы Гефсиманского – 17 февраля (2 марта) и в Соборе Радонежских святых – 6 (19) июля.




Имя:*
E-Mail:


Основан в 2008 году