Святой источник
    Вход Регистрация
Специалист по обустройству родников, святых источников

Повесть и чудеса пречистые Богородицы, честнаго и славнаго ея явления образа, иже въ Казани

Автор: Плаксин Олег
Опубликовано: 28 августа 2008 г. 17:51, посмотрело: 5711
Божия Матерь

Повесть и чудеса пречистые Богородицы, честнаго и славнаго ея явления образа, иже въ Казани

Списано смиреннымъ Ермогеномъ, митрополитомъ Казаньскимъ.

Благослови, отче.

Аще убо и предивно чюдо содbяся в роде нашемъ милостивнымъ посbтомъ Творца благому всему, Господа нашего и Бога Iсуса Христа, и рождьшей Его Пресвятыя и Преблагословеныя Владычицы нашея Богородицы и Приснодbвыя Мария пречюдною и чюдотворною иконою въ преславномъ градb Казани: но како возмогу, недостоинъ сый и недостойне устнb имbя, провbщати таковая?

Но обаче, надbяся на неизреченныя щедроты Сына Божия и Того Рождьшия молитвы, вселенныя учителя глаголъ восприиму: благословенъ Богъ и Отецъ Господа нашего Iсуса Христа, Отецъ щедротамъ и Богъ всякия утbхи, утbшаяи насъ о всякой скорби нашей и благословивый насъ благословеніемъ духовнымъ. Преже убо праведный гнbвъ свой, безакония ради нашего, вмале испусти на насъ, оцыщая многия грbхи наша: и въ мало дней оскорбихомся. Потомъ же, благодати ради Божия, скорбная забыхомъ неизреченнаго ради человbколюбия Божия на насъ, и радости несказанней сподобихомся, явления ради иконы Божия Матери и Тоя Превbчнаго Младенца Господа нашего Iсуса Христа. Повсюду убо протекоша, яко громъ, во вся конца россиския земля Божие к намъ милостивное посbщение — Богородицины иконы явление и неизреченные чюдеса, ихъже подаетъ неоскуднb с вbрою приходящимъ. Мнb же, недостойному, самовидцу бывшу, како или коими чюдесными благотворении яви Богъ и Богородица от земныхъ нbдръ чюдотворный Свой образъ (яко же преди простретися слово хощетъ), писанию ж предати замедлившу или отъ недостатка разума, или отъ нерадbния и душегубителные лbности, ово же и страха ради недостоинства: пленицами бо моихъ грbховъ стягнутъ есмь и таковымъ преславнымъ вещемъ нелbпо ми бb коснутися, но развb точию безаконня моя знати и просити отпущения безчисленымъ моимъ согрbшениемъ. Но понеже желание привлачитъ мя и страхъ глаголати нудит мя, грbси же мои, яко бремя тяжко, отяготbша на мнb: и что убо сотворю? дерзну ли к начинанию? что убо? реку ли или запрещу себb окаянства ради моего? или паки внимаю восходящая на сердце мое блаженьствомъ о Всепbтей, и Богоприятней Богородицы и Приснодbвbй Марии? Но Ты Сама содbйствуй ми, о Преблагословеная, Заступнице Усердная, Мати Бога Вышняго, яко да воля иже ис Тебе рождьшагося Христа Бога нашего будетъ: да ми, недостойному, помрачивыйся умъ мой тобою, о Всенепорочная, просвbтится (ты бо за всbхъ молиши сына своего, Христа Бога нашего) и пишущу ми содbйствуй: всbмъ бо твориши спастися, в державный Ти покровъ прибbгающимъ. Множицею бо воспомянухъ, нbкогда же и слезы испустихъ, вbдый мое недостоинство. Но обаче и се ми во умъ прииде, яко неправедно есть Божиихъ таинъ и неизреченныхъ к намъ и многомилостивныхъ дорованиихъ в забвения глубине погружати, имже многимъ источникомъ целебнымъ и самовидецъ быхъ: и, елико видbхъ и слышахъ о пречюдней Ти иконе, подай ми, о Всепbтая, глаголати и писати, и всbхъ насъ заступи, Госпожа Царице. Аще по достоянию и нbсмь достоинъ похвалы Тебb принести, малы нbкия отъ великихъ; но обаче сподоби мя, о Владычице, о Твоихъ неизреченныхъ на насъ благодbянихъ хвалу Тебb принести; и яко же сподобила мя еси, о Всеблаженая, недостойнаго и грbшнаго, скверными моими руками преже всbхъ священныхъ прикоснутися пречистому Твоему образу и чюдотворнай иконе и Сына Твоего Христа Бога нашего. Аще бо и вси достойни, но аз недостоинъ сый: но обаче влекомъ жадая, да поне прикоснуся пречистому Твоему и чудотворному образу, Владычице, и Превbчнаго Ти младенца Спаса Христа.

Нынb же паки что реку или что возглаголю великоименитей Дbвbй, паче же рещи многоименитей, пророки прореченнbй? Пять убо к десятимъ лbтомъ преидоша явлению чудотворныя Богородицыны иконы, чюдесная же исцеления безпрестани неоскудно бываютъ, и вся страсти душевныя и недуги телесныя немедленно от человbкъ отгоними бываютъ. Сие паки призываетъ мя к торжеству и глаголати понуждаетъ: и яко подобаетъ ми и писанию сия предати, да не буду осуженъ, якоже и скрывый талантъ господина своего. Понеже убо человbческий родъ обыче и святыхъ памяти духовные с похвалами празновати, а иже Пресвятbй и Преславней Царице царски празники празновати, Пречистыя Богородицы и Приснодbвы Мария, — сию попремногу паче онbхъ любовию почитати должны есмы (Та бо есть божественый покровъ рабомъ своимъ), и притецати к тихому сему и доброму Пристанищу, скорой Помощнице, готовому и теплому Спасению, Покрову Дbвыя; и яко Вышшей і паче всbхъ тварей вышшую похвалу принести, яко Царице и Владычице царя и Владыку всbхъ рождьшую: Тоя бо ради праматерняя клятва потребися и Адамъ отъ вbчныхъ уз свободися, и Богъ к намъ примирися. Тогда бо Иаковля лbствица утвердися. Богу хотящу по ней снити и человbкомъ путь сотворити къ небеснымъ и человbцы со ангелы во едино быша: не ктому, яко же тогда, со Ияковомъ древле борется, ибо Творецъ Иаковль на землю сниде, погибшую драхму взыскати хотя и Отцу принести. Тbмже пророцы тогда возрадовашася, своему пророчеству збытіе зряще. Тогда убо Давыдъ, видbвъ отъ сbмени его правнуку родившуся, бряцая в гусли, играя духомъ, глаголя: слыши, дщи, и виждь, и приклони ухо твое. Тbмже тогда не токмо пророцы, но и превышняя и земная тварь съпразноваше. Нынb же паки приспb новый празникъ честный Владычицы нашея Богородицы честнаго Ея образа иконы Одигитрия, крbпкия помощница: да познаютъ вси, яко не токмо, егда въ мирb бяше, ходатайственое къ своему Творцу и Сыну показоваше, но и паче, и по преславномъ своемъ преставлении отъ земныхъ въ небесная, непрестанно милостивно насъ присbщая. Тbмже, оставльше начало словеси, на совершеніе ведемся шествующе. Да коснемся иже о сихъ бесbде, елико подастъ Святый Духъ, преже похваливше ваше усердие теплое. Толико бо к церкви ваше тщание, паче-же к чюдотворней Богородицынай иконе вbра и моление, елико чадомъ к матери, елико жаждущему ко источнику, елико кораблю къ пристанищу. Толико и насъ веселитъ преспbяние ваше, яко нынb явити намъ о семъ. Грbхъ ради нашихъ Богъ наказуя насъ и наводя на насъ милостивнb праведный гнbвъ свой, овогда гладомъ, овогда нашествиемъ иноплеменныхъ, иногда моромъ и межусобными бранми, овогда пожаромъ и прочими напастьми жития, и беды и тесноты и недуги люты наводя на насъ, — понужаетъ же паче ленивыя и жестокия на благая и подобная и спасеныя пути. Се убо реченное пророкомъ Давыдомъ къ Господу: броздами и уздою челюсти ихъ востягнеши, не приближающимся к Тебb многи раны. I во иномъ псалмb глаголетъ: аще оставятъ законъ Мой и в судбахъ Моихъ не пойдутъ, аще оправдания Моя осквернятъ и заповbди Моя не сохранятъ, посbщу жезломъ беззакония ихъ и ранами неправды ихъ, милость же Мою не разорю отъ нихъ. Апостолъ: его-же любитъ Господь, того и наказуетъ, бьетъ бо всякаго сына, его же приемлетъ; аще безъ наказания, преблудодbйчища есте, а не сынове. Понеже зловодими есме человbцы и неудобно шествие имамы к добродbтели, и мало о спасении душь нашихъ печемся, попущаетъ Владыка нашъ Господь напастми и бbдами, и скорбми и недуги лютыми. Даже къ Нему обращаемся и о нашемъ спасении всеобразно печемся. Сия намъ содbяшася праведнымъ судомъ Божиимъ.

Бысть же сице. В лbто 7087 [1579] при державb благочестиваго и христолюбиваго, благовbрнаго Государя Царя и великаго князя Ивана Васильевича всея Руси Самодержца, и при его благородныхъ царевичехъ — князе Иване Ивановиче и князе θеодоре Ивановиче (нынb же Божиею благодатию Государь, Царь и Самодержецъ всея Руси), и при святbйшемъ митрополите Антонии Московскомъ и всея Руси, и при архиепископе Казанскомъ Иеремbе, мbсяца Июня 28 день, на память святыя мученицы Агрипbны, бысть пожаръ в новопросвbщенномъ граде Казани, по взятьи града в двадесят шестое лbто, яко достовbрнейши сами видbхомъ. Загорbся в полуденное время близь церкви святаго Николы, иже зовется Тульский, во дворb нbкоего воина царева Данила Онучина. И мала нbкая часть посаду остася, и половина града к соборней церкви и дворъ архиепископль остася. Болшая же часть посада: и торги всb, и во граде обитель боголbпнаго Преображения Спасова, и дворъ великого князя — увы! вся огнь всеядец пояде и пожже и без вbсти сотвори. Людие же христолюбивии вbрою не отпадше, но познаша своя согрbшения, на покаяние обратишася и начаша созидати церкви Божия и своя домы: и Божиею милостию мbсто убо иноязычно и новопросвbщено просвbщашеся святыми церквами и Божественными учении. Языцы же невbрнии мнози бяху во граде и вbры многи. И бысть имъ в притчю и в поругание истинная православная вbра, источника же целебнаго не бb тогда во граде. Иноязычнии же, невbриемъ одержими въ сердцыхъ своихъ, уничижаху насъ, не вbдяще Божия милости и силы: видbша бо окаяннии Божие милоседрие къ намъ, еже с милостию наказание; еже милуяй насъ наказуя, яко отецъ чадолюбивъ, за наша согрbшения, оцыщая грbхи наша. Человbколюбецъ же Богъ, видя терпbние людей своихъ и вbру ихъ, и поругание, и поношение окрестъ живущихъ иновbрныхъ, и не терпя поношения и похуления на святыя иконы и да не рекутъ языцы: гдb есть Богъ ихъ, в него же вbруютъ? Да заградятся уста, иже глаголютъ неправду и дабы убо исчезло и не помянулось жидовское и безсерменское суровство и тщегласное хуление ихъ, и дабы искоренилось злоплевельное еретическое учение, и утвердилась бы и просвbтилась православная вbра истинная християнская. греческаго закона, правымъ учениемъ Господа нашего Iсуса Христа и святыхъ его ученикъ и апостолъ и богоносныхъ отецъ и всbхъ святыхъ, утвердившихъ православную вbру Христову и научившихъ вbровати «во Отца и Сына и Святаго Духа», нераздbлимую Троицу. Предстательствомъ убо и молениемъ Заступницы нашея Царицы Владычицы Богородицы и Приснодbвы Мария, еже къ Сыну Своему и Богу нашему приснымъ предстояниемъ, нынb же ради благодати Божия в сие в послbднее время показа намъ праведное и всесвbтлое солнце, и отверзе породу Едема затвореннаго, и яви отъ земли пресвbтлую икону, источникъ неизчерпаемый, Своимъ человbколюбнымъ смотрениемъ в земли сокрыему чюдотворную икону Матери Своея, а нашея Царицы, Владычицы Богородици и Приснодbвы Мария честнаго ея Одегитрия, и Свой человbколюбный образъ. Отнюду же убо праведный гнbъ Свой за наше согрbшение испусти, оттуду близъ мbста того, яко камени вержениемъ, и благодатию свbтящую лучю и исцеления источникъ показа. Яви убо себе Богородицына икона сицевымъ образомъ. Не яви убо образа своего Владычица ни святителю града, ни начальнику властелинску, ниже вельможи или богату, ниже мудру старцу: но яви свое честное сокровище, источникъ неизсчерпаемый приходящимъ с вbрою, чудный свой образъ, нbкоего мужа от простыхъ, имуща мудрость на войнb стрелебную, сего дщи юнна, десяти лbтъ суща, именемъ Матрона. Сей бо дbвицы явися чюдная она и пресвbтлая икона Богородицына. И после убо пожара в томъ же лbте и месяце, сице нача являтися дbвицы оной, ей же имя преди рекохомъ, икона пресвbтлая Божия Матери. И веляше ей поити во градъ и повbдати про икону Богородицыну, ея же видb, архиепископу и воеводамъ, дабы шед выняли образъ Пречистые Богородицы от земленыхъ нbдръ: и мbсто повbда ей, идbже последи обрbтоша драгаго бисера честное сокровище, чюдную икону Богородицыну. Дbвица же убо, юна и немыслена, боящеся повbдати: и абие едва повbда матери своей, мати же глаголы ея ни во что же вмbнивъ. И послbди же убо въ видbнии не единою являшеся ей пресвbтлая и чюдная она икона и веляше ей безъ сумнbния сие видbние повbдати. Девица же не единою, но и многажды, сказоваше матери своей явление чюдные тоя божественыя иконы: веляше ей безъ сумнbния повbдати сие видbние. Во единъ же убо день случися дbвицы оной, ей же имя выше надписахомъ, спати в полудне: и внезапу дbвица обрbтеся посреди двора своего, в немъ же живяше, и абие явися ей чюдная и пресвbтлая Богородицына икона страшнымъ огненнымъ образомъ, лучи испущая огнены, пресвbтлы и страшны зbло, яко мнbтися ей от пресвbтлыхъ тbхъ лучъ, сияющихъ от иконы, сожжене быти. И гласъ бысть отъ образа страшенъ, къ дbвице глаголющъ: «аще убо не повbси глаголъ Моихъ и не пойдеши от земленыхъ нbдръ выняти образа Моего, Азъ же убо имамъ во иной улицы явитися и во иномъ граде, ты же имаши болbзнена быти, дондеже и живота злb гонзнеши». Дbвица же, от страшнаго сего видbния зbло ужасшеся, паде на землю и бысть яко мертва, и лежаше на земли на многъ часъ. И абие возопи велиимъ гласомъ к матери своей, дабы шедъ повbдала архиепископу и правителемъ града того о чюдней и пресвbтлей иконе Преблагословеныя Владычицы нашея Богородицы и Приснодbвbй Марии; и повbда ей вся глаголы реченныя, яже слыша отъ пресвbтлыя иконы, и мbсто указуя. Мати же ея скоро иде во градъ к воеводамъ, и дbвицу предъ ними представи; повеле ей, да сама глаголетъ, яже о ней содbянная. Дbвица же повbда имъ вся глаголы реченныя, яже слыша от причюдныя и великолbпныя Богородицины иконы, и мbсто указуя. Они же убо, невbриемъ одержими о пречестней Пречистыя иконе, о ней же девица повbда, и ни во что же вмbниша. Мати же прослезився, вземь дщерь, иде къ архиепископу, тb же предиреченныя повbда глаголы и мbсто указанное ей сказуя: дабы повелbлъ выняти святую Богородицыну икону. Архиепископъ же не внятъ рbчемъ ея и отосла ю бездbлну: бb же приходъ ихъ въ седмый часъ дне, обрbтоша же чюдный онъ пресвbтлый образъ Богородицынъ въ часъ вторый на десять, по пожаре на томъ же лbте, мbсяца Июля въ 8 день, на память святаго великомученика Прокопия. Бысть же сице. Пойде убо жена та к дому своему, повbдая всbмъ людямъ о чюдней иконе: како видbние видb дщи ея. Людие же, дивящеся о глаголехъ ея и отхождаху не внимающе речемъ ихъ. Она же, вземъ заступъ и пришедъ к показанному мbсту, нача копати много время, и не обрbте искомаго. Помале же убо начаша инии копати: и все уже мbсто воскопаше, ничто же обрbтше. Предиреченная же она дbвица нача копати на мbстb, идb же пещь бb; таже и прочии съ нею. И яко выкопаша мало боле двою лактей — оле чюдо! явися чюдотворная икона Владычицы нашия Богородицы и Приснодbвы Мария, честнаго ея Одигитрия, купно с превbчнымъ младенцемъ, Господемъ и Богомъ нашимъ Iсусомъ Христомъ. На чюднай же той иконе бb рукавъ однорядки сукна вишнева ветхъ; самый же чюдотворный образъ свbтлостию чюдне сияя, якоже внове вапы начертанъ. Земному же праху никако же коснувшуся чюдному тому образу, яко-же сами видbхомъ. Девица же, вземъ Пречистые образъ со страхомъ и трепетомъ и радостию, и поставиша на томъ же мbсте. Людие же ту сущии возопиша, проповbдающе немолчными гласы явление божественныя тоя иконы. И вскорb стекошася безчисленое множество благочестивыхъ народа, вопиюще со слезами: «Владычице, спаси ны!» И послаша вbсть ко архиепископу и к первымъ града, яко обрbтоша Богородицынъ святый образъ. Архиепископъ же повелb скоро в колоколъ звонити. И пойде со кресты на мbсто то со всbмъ освященнымъ соборомъ, идbже обрbтоша чюдную Пречистые икону, с воеводы и со множествомъ народа. I видb Пречистые образъ: яко-же новъ даръ пречюдне свbтяшеся, и дивися убо зело, яко такова переводомъ образа не видbша нигдb же, и недоумbвашеся. Страхомъ убо и радостию одержими, невbрия ради своего, с плачемъ моляся и милости прося, и прощения о согрbшении. Сице же и воеводы с плачемъ просяще милости, еже согрbшиша к чюдотворному Пречистые образу, нерадbниемъ и невbриемъ. И весь народъ града стекашеся, на дивное то божественное чюдо веселящеся, со слезами и радостною душею хвалу Богу и Богородицы, о обрbтении многобогатаго и безцbннаго сокровища возсылаху. Мнb же тогда в чину поповсте святаго Николы, иже зовется Гостинъ, каменосердеченъ же сый: но обаче прослезихся и припадохъ к Богородицыну образу, и к чюдотворней иконb и к превbчному младенцу Спасу Христу, и потомъ поклонихся архиепископу, и благословение испросихъ о еже бы повелbлъ взяти ми пречюдную Богородицыну икону; архиепископъ же благослови мя и повелb взяти ми. Азъ же, аще и недостоинъ сый, но обаче со страхомъ и радостию прикоснухся чюдотворному тому образу: и взяхъ з древца, иже бb поткнено на томъ мbсте, идbже въ земли бb святая та и чюдная икона. И по повелbнию архиепископа, с прочими святыми иконами и честными кресты, идохъ со иконою въ близъ сущую ту церковь святаго Николы, иже зовется Тулский: и тамо, молебному пbнию совершившуся, и паки архиепископъ со всbмъ освященнымъ соборомъ, и первии града, и все множество православныхъ народа, со женами вкупb и детми, вслbдъ святыхъ иконъ во градъ идущи. К новоявленней же чудотворней иконе безчисленое множество народа рbяхуся, и другъ друга попирающе, инии же по главамъ инbхъ ходяще, к чюдотворному образу тbмены прикасахуся. Мнb же, по повелbнию архиепископа, народа ради съ чюдотворною иконою медленно идущю, но обаче толикое множество народа не соврати мя ни на десно, ни на шуе: несох бо носящаго всю тварь, и того рождешей пречюдную и чудотворную икону. И въ той часъ Пречистые Богородицы образъ показа чюдо.
Чюдо 1-е.

Человbка просителя, именемъ Иосиθа, не видbвша очима ни мало, яко самъ повbда, три лbта, — прозрbти того Владычица сподоби. Враг же, не навидяй спасения человbкомъ, забыти тому сотвори вскоре богатаго Врача, подавшего исцеления, Пречистую Богородицу. Еже бы воздати молитву и благодарения, вмbсто того на прошение сребра паки устремися, ему же извыче: и вbрою отпаде и лbностию отягченъ, не получи до конца спасения. и невbдbния ради своего малу стезю зряше. Народи же, видbвши чюдо, и болшую вbру ко образу Пречистыя приложиша. И тако Пречистыя образъ, чюдотворную икону, внесоша въ соборную церковь Пресвятыя Богородицы честнаго и славнаго ея Благов?щения. И ту в соборной церкви Владычица показа чюдо второе.
Чюдо 2-е.

Человbка нbкоего, именемъ Никиту, не видbвша очима ни мало свbта, прозрbти того Богородица сподоби. Онъ же убо теплою вbрою припаде къ чюдотворному Ея образу и получи здравие, хваля и славя Бога и Пречистую Богородицу. И тако, пbвше молебная пbния, абие отидоша въ домы своя со страхомъ и трепетомъ и радостию многою. На утрие же архиепископъ служивъ божественную литоргию; народи же вси, приходяще въ соборную церковь к чюдотворному образу и дароношение приносяще: инь злато, инь же сребро, и кто что можаше, кииждо по силb. Пречистая же Богородица нача являти чюдеса своя. Преже реченную же дbвицу Матрену с материею ея почтоша архиепископъ же и воеводы и весь народъ. Чюдную же икону списавше и преславное явление чюдотворныя тоя иконы, и чюдеса, бываемыя отъ нея, написаша и послаша въ царствующий градъ на Москву к самодержавному царю Государю и великому Князю Ивану Васильевичю, всея Русии Самодержцу, и к сынома его — царевичю князю Ивану Ивановичю и царевичю князю θеодору Ивановичю, нынb же Божиею благодатию Государь Царь и Великий Князь, Самодержецъ всея Русии. И видbша убо христолюбивии царие чюдную икону Владычицы нашея Богородицы и Приснодbвbй Марии и честнаго ея Одегитрия и дивишася зело: яко такова образа переводомъ нигдb же не видbша. Благовbрный же Царь Государь и Великий Князь и сынове его повелbша на томъ мbсте церковь поставити, идbже обретеся чюдотворная икона, и монастырь дbвъ повелb устроити, и кbлии поставити и ограду монастырю оградити, и милостыню доволну повелb дати изъ своей царские казны: священному собору и игуменье, и 40 сестрамъ урокъ лbтний, еже и быстъ. И церковь поставиша во имя святыя Богородицы честнаго ея Одегитрия деревяну, и ограду монастырю сотвориша. Честную же ону и чюдотворную икону Пресвятыя Богородицы отнесоша в монастырь съ молебнымъ пbниемъ со кресты: архиепискупъ и боляре со всbмъ народомъ проводиша честно. Предиреченную же дbвицу Матрену постригоша въ томъ же монастыри: и наречено бысть имя ей Мавра во инокихъ, не по мнозе же времени пострижеся и мати тоя дbвицы. Поставиша же и другую церковь теплую с трапезою во имя Рождества Пречистыя Богородица. И абие нача являти Богородица чюдеса Своя.
Чюдо 3-е.

Человbкъ нbкто из Вияжскаго града лютb болbзнию одержимъ бb и приведенъ бысть к пречистому и чюдотворному образу женою своею, и моляшеся с теплою вbрою Богородицы и не отпаде прошения своего: получи здравие и отыде въ домъ свой радуяся.
Чюдо 4-е.

Нbкогда убо отроча материею своею принесено въ церковь, слbпо очима; мати же его стояше предъ образомъ Богородицы, с плачемъ моляшеся о прозрbнии отрачате. Отроча же внезапу нача руками осязати по лицу матерь свою. Народи же убо вси молишеся Пречистыя образу; архиепископъ же стояше на мbсте своемъ, зряше на отроча и видb сие, яко отроча матерь свою рукама осязаше. И повелb принести яблоко красно и показати отрочати. Отроча же и яблоко нача хватати: и вси истину увидbвше, яко прозрb отроча; и славу воздаша Христу Богу и Пречистой Его Матери Владычицы нашея Богородицы, творяще дивная чюдеса.
Чюдо 5-е.

Нbкто сынъ боярской, именемъ Ивашка тако нарицаемъ, прослутиемъ же Кузминской; у него же бb жена болна ногами: не можаше ими ни мало двигнути. Болbзнь бо велми одержаше ю и ничимъ же себb не можаше помощи, но паче труднее бываше. И абие повелb себb принести к чюдотворному образу Пречистей Богородицы и, молебная отпbвъ, со многою вbрою и со слезами моляшеся, милости прося: и абие получи здравие, и отойде в домъ свой радуяся.
Чюдо 6-е.

Бысть же убо, в веси сына боярскаго Василия Рагозина, нbкоего поселянина женb явися святая Богородица и веляше ити ей пречистому образу, иже есть в Казани, и повbдати мужу своему, дабы шедъ молился чюдотворному образу. Она же не внятъ рbчемъ Ея и мужу не сказа. Явижеся убо и второе сама Владычице: и абие нbкая божественная сила взятъ руку ея и удари ю по лицу ея и бысть рука ея суха. Жена же прииде во градъ и повbда все по ряду архіепископу случшаяся ей: и прииде к чудотворному образу, и получи здравие. И абие утвердися рука ея, якоже и другая. и отиде въ домъ свой радуяся.
Чюдо 7-е.

Человbкъ нbкто въ градb Казани, именемъ Исакъ, прорекломъ быкъ, нbкоторыя вдовы сынъ, именемъ Улиты, вbрны сущей, боящейся Бога, на посаде проскурни верховныхъ апостомъ Петра и Павла. И бысть в раслабленіи полтретия годы; болbзнь же его бb всbмъ знаема, живущимъ окрестъ: не можаше велми ногами и до полу. И посла матерь свою к чюдотворному образу Пречистыя Богородицы молебная пbти. Самъ же убо в дому своемъ на одрb лежаще и начатъ со слезами предо образомъ плакати и молитися Пресвяте Богородицы, дабы ему самому видети чюдотворный Богородицынъ образъ. И в томъ часb видb себb мало легчайши отъ болbзни: и абие милостию Пречистые Богородицы воставъ о собb на ногахъ и начатъ по малу поступати и, вземъ два посоха и абие подпираяся ими, пойде въ монастырь к чюдотворному всемилостивому Богородицы образу. О великихъ Ти чюдесъ, Богородице! матери со слезами о сыну молящися, сынъ же ненадежно и самъ в монастырь прииде: мати же его видb и изумися, и едва во умъ прииде, и нечаемое извbстно увbде. И приложиша к слезамъ слезы, молящеся Богородицы о исцелении: и тако до конца получи здравие. И воздаша хвалу и славу Господу Богу и Пречисте Богородицы, мbсяца Апрbля въ 30 день отойдоша во свой домъ, хваляще и славяще Бога, творящего дивная и преславная чюдеса.
Чюдо 8-е.

Жена нbкоего пришелца, Полоцкаго попа Григория. живяше в селb в Тагашевb (тако бо звашеся мbсто то), именемъ Елена. Бысть же болна очима три лbта и абие убо отъ многия тоя болbзни и зракъ отъяся, якоже уже не видbти ей ни мало. И услыша убо многая и преславная чюдеса отъ иконы Пречистые Богородицы во градb Казани, и пойде во градъ к чюдотворному образу милости просити. И еще убо ей недошедши града Казани яко седми поприщъ, и абие внезапу узрb свbтъ очима и мнbтися ей, яко николиже ими болна бb: и пришедъ в монастырь к чюдотворному образу, хвалу воздаде Господу Богу и Причистой Богородицы.
Чюдо 9-е.

Повbда намъ инокъ Иосиθъ, иже нынb погребный ключникъ в дому Пречистыя (тогда же живя въ Троецкомъ монастырb, иже въ Казани): бысть, рече, болbти ему очима, яко ни мала свbта видbти; и абие обbщася молебная пbти Пресвятbй Богородицы. И егда приидоша священицы с чюдотворнымъ Пречистыя образомъ, в день недbльный, в соборную церковь Пресвятыя Богородица честнаго и славнаго Ея Благовbщения, к молебну, Иосиθъ же у чюдотворнаго образа во время молебнаго пbния моляся прилежно. И не получи исцеления, и отиде скорбенъ. И абие возлеже отъ болbзни: и сведенъ бысть в сонъ тонокъ, и видитъ икону Святыя Богородицы. И бысть ему отъ иконы гласъ, глаголющь: «востани и пойди въ домъ Пречистыя, и отпой молебная, и утри лице свое пеленою и тако получиши исцеление». Онъ же, вставъ вскорb, и повелb себе вести в монастырь Пречистые Богородицы. И отпbвъ молебная и повелb себе покропити святою водою, и пеленою Пречистыя утерся. И въ той часъ отъ очию его отбbже болbзнь: и узрb свbтъ, и воздастъ славу Богу и Пречистей Богородицы.
Чюдо 10-е.

Нbкто человbкъ, именемъ Козма Окуловъ, Лаишескаво града, бысть во иступлении ума. Свои же ему совbщаша итти в Казань к Пречистой Богородице в монастырь. Онъ же в себb бывъ и нача Пречистой Богородице о исцелении молитися: и помощию Пресвятыя Богородицы бысть ему облегчение, и прииде в монастырь и образъ Пречистые сподобися вид?ти по своему обbщанию, якоже обbщася. И молебная пbвъ и абие получивъ совершено исцеление, и бысть здравъ и отиде в домъ свой, радуяся и славя Бога и Пречистую Богородицу.
Чюдо 11-е.

Человbкъ нbкто во граде Казани, именемъ Онтонъ, прорекломъ Кажеваръ; ему же жена, именемъ Пелагия, не видb очима яко дней 40. Слышевъ же многия и преславныя чюдеса отъ Пречистыя Богородицы чюдотворнаго Ея образа, и в день недbльный иде в монастырь Пречистые Богородицы. И многою вbрою одержима бb, не погрbши надежи, но получи изцеление. Егда убо приидоша с чюдотворною иконою Богородицыною с соборнаго пbния молебнаго священицы, жене же той случися срbсти икону Пречистыя, сошедъ съ паперти церковные: и абие въ той часъ прозрb, и отиде въ домъ свой, радующеся, хваля и славя Бога и Пречистую Богородицу.
Чюдо 12-е.

Человbкъ нbкий, именемъ Троθимъ, Ларионовъ сынъ, Колмогорсково уbзду, волости Листра острова, во граде Самаре впаде в болbзнь и лютb трясавицею одержимъ; ктому-же на очи ему прииде тяжка болbзнь. Онъ же, слышавъ Пречистыя Богородицы неизреченное милосердие, еже подаетъ отъ чудотворныя своея иконы неоскудное исцеление съ вbрою молящимся ей, и нача молитися Пресвятbй Богородицы о исцелении. И абие видитъ во снb икону Пречистыя Богородицы, стоящу в возглавии своемъ, и гласъ слышитъ от чюдотворныя тоя иконы, именемъ его зовущ: «иди, рече, во градъ Казань ко образу моему, и тамо изцеление получиши». Онъ же возбнувъ и почю в себb облегчение не мало отъ трясавицы; тако-же и очная болbзнь не якоже исперва бb. И прииде во градъ Казань в монастырь Пречистые Богородицы во время святые литоргия, и нача пред образомъ Пречистые неутbшно плакати и с вbрою молитися, глаголя: «даждь ми, о Владычице, еже ми еси обbщала; не малъ бо путь трудихся милосердия Твоего ради». И абие вскорb исцеление получи отъ обою болbзней: и очима прозрb, и тbломъ здравъ бысть. И славя Бога и Пречистую Богородицу, повbдая всbмъ людямъ дивная и преславная от Пречистые иконы милосердие ея и скорое свое исцсление.
Чюдо 13-е.

Во граде Свияжскомъ попъ бb, ему-же имя Иванъ, церкви святаго великого чюдотворца Николы, иже зовется Жилецкой; ему-же жена, имя ей Домна. И по дbйству дияволю, нbкая сусbда ея, или любви ради, или хотя надъ нею бbду сотворити, в запойство упои ея, до токова зла. Идущи ей въ домъ свой, толикъ срамъ нанесе мужу своему и себb, яко и главотязю не обрbстися на ней; людемъ же многимъ позоръ дbющимъ, инbмъ же и скорбящимъ о таковbй срамотb: понеже мужъ ея человbкъ искусенъ бb и ненавидя пьянства, и злыхъ ошаяся, яко же и всbмъ намъ знати его. Самого-же попа того не бb тогда во граде, но бb отлучился нbкоего ради орудия. Жене же его на утрия і от сродникъ своихъ домашнихъ слышавше сотворившая ей напасть, впаде во отчадние и въ болbзнь тяжку зbло, ово страха ради, ово срама ради: и нача злымъ бbсомъ одержима быти. И бb болbзнь ея люта зbло: на кийждо день и нощь до десятижды и вящи случашеся ей лютая та нестерпимая бbда, зубы скрегча и пbны теща, и составы членовныя троскотаху злb, якоже самъ попъ Иванъ повbда намъ. И бb тако бbднb стража до тридесяти пяти недbль. Попъ же той Иванъ, безпрестани моля Бога и Пречистую Богородицу о исцелении жены своей и святыхъ угодникъ Божиихъ призывая в помощь, не единощи же и в Казань к чюдотворному образу Пречистыя Богородице привозя жену свою. И не получи ни мало отрады. Во сто же первомъ году, θевраля въ 7 день, паки привезе жену свою в монастырь къ Пречистbй Богородицы: и начаша со многими слезами молити Бога о исцелении ея. θевраля жъ 11 день бысть гласъ во снb игуменье монастыря Марье, дабы повелbла бbсную к чюдотворному образу прикладывати в то время, егда учнетъ бbсъ томити ея. Игуменья же Марья вскоре повелb тому быти. И егда нача бbсъ томити ея, и вземше бbснующуюся, приложиша к чюдотворному образу Пресвятыя Богородицы: и абие, въ той часъ, бысть недвижима отъ лютаго бbса, и обрbтеся здрава. И многу хвалу и благодарение воздаша Богу и Пречистой Богородице и идоша въ домъ свой, славяще Бога.
Чюдо 14-е.

Во граде жъ Казани человbкъ нbкто, именемъ Дмитрей, прорекломъ Тоскутей, ремествомъ скорнякъ; ему-же жена, имя ей Домна. Случися ей болbзнь тяжка зbло, рукама и ногама скорчившимся. И лютb болbзни той притужающи ей, яко зрящимъ на ню умилнb плакати. Дщи же ея, именемъ Неонила, девица, тою же болbзнию злb одержима: по всему убо яко и мати ея страдаше. И в болbзни своей къ Пречистой Богородицы умилныя глаголы со слезами вопияху, о исцелении молящеся, простягщи же ся имъ болbзни той на мbсячное. Дмитрей же, вземъ жену свою, и отвезе ю в монастырь в церковь Пресвятыя Владычицы нашия Богородицы, честнаго и чюдотворнаго образа явления. Жена же его нача со слезами и с воплемъ многимъ молитися Пречистой Богородице о исцелении, яко и незнающимъ ея рыдати и плакати. Дмитрей же отходитъ въ домъ свой, хотя и дщерь пояти къ Богородицыну чюдотворному образу. И абие ненадежно радость обрbте: пришедъ в домъ свой, и видb дщерь свою здраву и ничтоже отъ болbзни страждущу. И благодаря Бога и Пречистую Богородицу, иде вскорb к женb — повbдати ей изцеление дщери своея. Времяни же тогда бывшу чтому на литоргии святому евангелию, въ самое же то святое благовbстие, пременися отъ недуга и жена его: и бысть здрава, яко николиже болbвъ. Оле чюдо! во единъ часъ, по дbйству дияволю, дщи и мати люту скорбь болbзнену восприяша: во единъ же часъ от чюдотворныя Богородицыни пречюдныя иконы и исцеление восприяша. Дмитрей же и вси людие видbша предивное скорое, Пречистою Богородицею, жене своей и дщери от болbзни пременение; сугубо воздаша Богу и Пречистой Богородицы благодарение. Вопрошаху же жены его: како имъ найде со дщерию равенство недуга і во едино время? она же исповbда подробну: «бывши ей, рече, у нbкоего сосbда на обbде, и по времени иде въ домъ свой, и найде на пути платъ малъ завязанъ, и подъемъ его, и принесе въ домъ свой; и развbза платъ той — обрbте в немъ едину сребреницу да два орbха; и единъ орbхъ сама снbсть, другой же дщери вда: от того и пострадаша».
Чюдо 15-е.

Человbкъ нbкто, именемъ Оθонасей, Ероθbевъ сынъ, Ярославецъ, в день недbльный приведенъ бысть в соборную церковь Пречистыя Богородицы честнаго Ея Благовbщения. И многими человbцы едва одолbнъ бысть внити в церковь: бb бо бbснуяся и рbяся зbло, и никако же взирая, и не глаголя ничто же. Тогда же бb, яко же обычай, и чюдотворная Богородицына икона принесена въ соборную церковь: и поставиша его предъ мbстнымъ образомъ Пречистые Богородицы честнаго и славнаго Ея Благовbщения и предъ чюдотворною Богородицыною иконою. Онъ же никако же смотря, ниже глаголя. По отпbтии же молебновъ, вземъ святыя воды и покропихъ его: онъ же воззрbвъ и нача по малу во умъ приходити. И видbвъ образъ Пресвятыя Богородицы и рече: «Пречистая» и ту приложиша его къ Богородицину чюдотворному образу и къ прочимъ святымъ иконамъ. И по малb нача глаголати. Молебному же пbнию совершившуся и чудотворней иконе въ монастырь пошедше, намъ же святую и чюдотворную Богородицыну икону, яко же обычей, проводіхомъ. Тому же Оθонасью в соборную церковь возвратитися повелbхомъ, божественныя ради литоргия. И егда начаша чести святое евангеліе, той же предиреченный Аθонасие совершено исцелb молитвами Пресвятыя Владычицы нашея Богородицы, юже приноситъ о всbхъ насъ къ Сыну Своему, Христу Богу нашему. Намъ же, вопрошающимъ его о содbянныхъ, яже о немъ: что и како исперва прилучися болbзнь ему? онъ же повbда: «видbхъ, рече, въ нощи, яко приидоша многи толпы бbсовъ и претяху ему мукою, и показующе ему мечты своими, яко бы взношаху его на высоту и низпущаху долb, и ина злая дbюще ему. Болbзнь же его бb двb седмицы. Милостию же Божиею и молениемъ Пречистыя Богородица отиде въ домъ свой здравъ, радуяся и хваля Бога и Пречистую Богородицу.
Чюдо 16-е.

Сожительствуя же ми в кbльи моей инокъ Арсеній, зовомый Высокий, иже послbди бысть архимаритъ монастыря святаго Спасова Преображения. И прилучися ему болbти ногою: болbзнь же ту нарицаху камчюгъ, инии же инако зваху. Мы же тому неразсудни суще, не вbдяху имени болbзни той; но обаче болbзнь крbпка зbло, яко едва мощи ему мало ступати нужи ради и здоровою ногою: ис кbлии же, кромb великия нужа, никако-же исходити ему, болbзни тоя ради. В тоже время и повелbние отъ Самодержавного Государя Царя и Великого Князя θеодора Ивановича всея Руси прииде къ намъ, по молению иноковъ монастыря боголbпново Спасова Преображения, иже въ Казани, благословити и поставити предипомянутого Арсенья архимаритомъ. Тогда же поставити его не бb мочно, зbлныя ради его болbзни. Приспbвшу же празнику Преполовения (въ онь же день святая и апостольская церкви празнество повсюду прия исходити с литиею и молебная пbния совершати), мнb же ис кbлия въ церковь еще не изшедшу, съ чюдотворнаю же Богородицынаю иконаю приидоша священіцы, якоже обычей. Предипомянутый же Арсеней во оконце смотря и со слезами Богородице о исцелении моляся. И внезапу нача с великимъ рыданиемъ плакати и благодарити Бога и Пречистую Богородицу, повbдая своей болbзни изцеление. Токмо, рече, гласъ испустихъ и прослезихся, Богородица же вскорb милосердие Свое показа на мнb И той часъ иде ис келия в соборную церковь самъ о себb. И пришедъ в церковь, пbвъ молебенъ и благодарение воздая Богу и Пречистой Богородицы о исцелении своемъ.

Отъ образа же Пречистые Богородицы неисчетно многа исцеления подаваются приходящимъ с вbрою. Но обаче доволно и по ряду хто возможетъ исписати Богородицыны чюдеса? дерзнухъ бо написати от великихъ малая, ина же многа преминухъ: земли убо широта, и морю глубина, и Богородицына чюдеса неизочтена. Сия же написахъ, яко да не забвению предана будутъ в послbдняя времена.

Благочестивому же и Самодержавному Государю Царю и Великому Князю θеодору Ивановичу всея Русии исперва, отнелb же явися целебный источникъ — икона чюдотворная Пресвятыя Владычицы нашея Богородицы, вся сия знаема суть. И вbрою теплою и духомъ горя, яко же слышахъ отъ его царскихъ устъ ко мнb, рабу его и богомолцу, глаголемая въ то время, егда повелb мя Божиимъ изволениемъ устроити въ чинъ митрополита. Слышахомъ, рече, о милостивнемъ неизреченнемъ человbколюбии Божии и Пречистыя Богородицы на насъ: како яви Богородица чюдотворную и пречюдную свою икону в нашей отчінb Казани, простирая к намъ милость свою; и како подаетъ неизреченныя целбы съ вbрою приходящимъ. И хощу, рече, недостаточная исполнити, еже и бысть. Повелениемъ его царским, въ лbта 7102 [1594] в недbлю святыхъ женъ міроносицъ, Апрbля 14 день, на память иже во святыхъ отца нашего Мартина папы Римскаго, заложенъ бысть храмъ предивенъ каменъ Пречистыя Владычицы нашея Богородицы и Приснодbвы Мария честнаго и славнаго Ея Одигитрія чюдотворнаго образа явления, а в предbле храмъ честнаго и славнаго Ея Успения; другой предbлъ святаго благовbрнаго великаго князя Александра Невскаго, во иноцехъ Алексія, новаго чюдотворца. Священа же бысть святая та церковь и с придbлы 7103 [1594] г. Октебря 27 дня в недbлю, на память святаго мученика Нестера, гдb Iсусъ болшой обложенъ сребромъ того же лbта; и тbми мbстными иконами и книгами, и ризами, и прочими церковными потребами повелb Государь Благочестивый Царь и Великий Князь θеодоръ Ивановичъ, всея Русии Самодержецъ, удоволити, еже и бысть. Самую же ту пречюдную и чюдотворную Пречистыя Богородицы икону златомъ и камениемъ драгимъ и жемчюгомъ великимъ предивне украси царскихъ сокровищъ хранитель Деменша Ивановичъ Черемисиновъ. Инокинь же старицъ въ монастырb. Хлbбъ имъ и денги и прочая потребная из царские казны.

Мы же Божиею благодатию и Пречистые Богородицы чюдотворнымъ Ея образомъ хвалимся и веселимся и воспbваемъ пbснь побbдную Сотворшему дивная чюдеса, во Троицы славимому Богу, Отцу и Сыну и Святому Духу нынb и присно и во вbки вbкомъ. Аминь. Из библиотеки Несусвета
Приводится по: Творенiя святbйшаго Гермогена, Патрiарха Московскаго и всея Россiи. – Изданiе Церковной Комиссiи по чествованiю юбилейныхъ событiй 1612, 1613 и 1812 годовъ. М.: Печатня А. И. Снегиревой, 1912.





Основан в 2008 году