О преподобне и богоносне отче наш Александре! Велие имея к Богу дерзновение, молися выну о нас, зане буря многих бед и скорбей обдержит ны: се бо недузи телеснии, болезни душевныя, приражения вражия обуревают ны; ходит бо враг наш, иский кого поглотити, и ежечасно от него уловляемся, о спасении своем нерадяще, несмы достойни ниже воззрети на высоту небесную. Но ты буди нам помощник во всем скорый и от зол избавитель; подаждь убо нам память смертную, слезы покаяния и надежду спасения: да не во отчаяние впадем, ниже дерзостным на милосердие Божие упованием, во гресех же пребыванием в конец себе погубим; но да будет нам память грехов наших во источник теплых слез и сокрушения сердечнаго, милосердие же Божие и благодать Его во спасение наше, молитвами твоими. Аминь.




О преподобне и богоносне отче наш Александре, предстоя Престолу Пресвятыя Троицы, молися выну ко Господу: страждущую страну Российскую от лютых безбожник и власти их да свободит, и да возставит православных правителей, верных рабов твоих, в скорби и печали день и нощь вопиющих к тебе, многоболезненный вопль да услышит, многомилостиве блаже наш, изведи от погибели живот наш, да ходим кийждо достойно звания нашего, в немже звани быхом, и да будет земля наша добра, и вси живущии на ней род избран, царское священие, язык свят, людие обновлении, ныне и присно и во веки веков. Аминь