МОЛИТВА ПЕРВАЯ

Приими Всеблагомощная Пречистая Госпоже Владычице Богородительнице, сия честныя дары от нас, недостойных раб Твоих, к Твоему цельбоносному образу пение возсылающих со умилением, яко Тебе Самой сущей ту и послушающей моления наша и подающей с верою просящим по коемуждо прошению и исполнение: скорбящим скорби облегчаеши, немощным здравие даруеши, расслабленныя и недужныя исцеляеши и от бесных бесы прогоняеши, обидимыя от обид избавляеши, и насилуемыя спасаеши, грешныя прощаеши, прокаженныя очищаеши и малыя дети милуеши, и неплодныя от неплодства разрешаеши. Еще же, Госпоже Владычице, от уз и темниц свобождаеши и всякия многоразличныя страсти исцеляеши и очныя болезни врачуеши и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О всепетая Мати, Пречистая Богородице! Не престай молити о нас, недостойных рабех Твоих, славящих и чтущих Тя, покланяющихся пречистому образу Твоему и надежду имущих невозвратну, и веру несумненну, к Тебе, Приснодеве Преславней и Непорочней, ныне и присно и во веки веков. Аминь.



МОЛИТВА ВТОРАЯ

К Тебе, Богоизбранная Отроковице, Пресвятая Дево Богородице, небеси и земли Царице, припадающе, вопием: услыши молений наших глас и не отврати лица Твоего от нас недостойных. Приими, Всеблагая, от недостойных раб Твоих, чтущих всечестное имя Твое и с верою покланяющихся Тебе пред чудотворным Твоим образом, приносимое ныне теплое моление наше; вознеси е к престолу Сына Твоего, Христа Бога нашего, да милостив будет к неправдам нашим, да пробавит щедроты Своя. Вемы, яко несмы достойни, по грехом нашим, от Него помиловани бытии, аще не Ты, Владычице, умолиши Его о нас: вся бо можеши испросити у Него, Матернее бо к Нему имаши дерзновение. Сего ради к Тебе, яко Всемощней и Всеблагой заступнице нашей, прибегаем, усердно молящееся: испроси у рождшагося от Тебе Единороднаго Сына Божия, Христа Бога нашего, всем нам в святоотечестей православней вере твердое до конца дней наших пребывание и во всех заповедех Господних неуклонное хождение, да, прочее время живота нашего поживше во всяком благочестии и чистоте, сподобимся мирныя христианския кончины и добраго ответа на страшнем суде Сына Твоего и Бога нашего и тако достигнем, под кровом Твоея помощи, живота вечнаго во Царствии Отца светов, Емуже купно со Единородным Его Сыном и Святым Духом, подобает слава, честь и поклонение, ныне и присно и во веки веков. Аминь.