Регистрация

Акафист святой праведной Иулиании Лазаревской

Автор: Плаксин Олег
Опубликовано: 8-11-2015, 20:55, посмотрело: 1100
Праведные

Акафист святой праведной Иулиании Лазаревской

Кондак 1

Избранную Богом праведницу возвеличим, милосердую матерь святою песнию почтим. Ты же душетленнаго нечувствия избави нас, зовущих: Радуйся, преблагая Иулиание, многомилостивая заступнице наша!

Икос 1

Ангельскаго чина не сподобися на земли, Иулиание, но и в мире сем херувимски пожила есть. Сего ради ублажаем тя пресветлыми словесы: Радуйся, от родителей нищелюбных рожденная; радуйся, вне отчего крова сиротою вскормленная. Радуйся, муромских лесов лилее благоуханная; радуйся, градов и весей наших звездо светозарная. Радуйся, Христовою любовию освященная; радуйся, покровом Богородицы осененная. Радуйся, преблагая Иулиание, многомилостивая заступнице наша!


Кондак 2

Видевше в нощи силу вражию, яко дым расточаемую и премудрого старца святителя, укрепляющаго тя, небоязненно возгласи: Аллилуия.

Икос 2

Разум наш недоумеет, яко бремя многочадия несуще, немятежие соблюла еси, блаженная, но вера наша понуждает взывати: Радуйся, Господа собеседнице тихая; радуйся, Христова рабо послушливая. Радуйся, Церкви ученице мудрая; радуйся, супругу содружнице верная. Радуйся, чадом мати сострадательная; радуйся, слугам госпоже благосердая. Радуйся, преблагая Иулиание, многомилостивая заступнице наша!


Кондак 3

Сила духа твоего и кротость души не остави тя, егда лютая смерть исхити младенцы твоя. Ты же, на Промысел благий уповая, рече: Аллилуия.

Икос 3

Имуще, Иулиание, сердце милующее, последняя своя не пощаде от велика глада страждущим людем, благодарящим тя: Радуйся, в годину темную любовию сиявшая; радуйся, яко солнце, землю согревшая. Радуйся, алчущих хлебом питавшая; радуйся, унывающих словом утешившая. Радуйся, чрез нищих Христу послужившая; радуйся, чрез щедрость Царствие стяжавшая. Радуйся, преблагая Иулиание, многомилостивая заступнице наша!


Кондак 4

Буря новая смертоносныя язвы порази людей русских. Ты же, о праведнице, молитвою святою телеса исцеляше и души воздвизаше пети: Аллилуия.

Икос 4

Слышавши весть о убиении сына старейшего, горький плач ко Христу пролияла еси, крестоносице, в руце Его скорбь свою предавше. Мы же веру твою величаем: Радуйся, житие в странствие вменившая; радуйся, во успение, яко в путь к бессмертию, уверовавшая. Радуйся, печали на Бога возложившая; радуйся, супруга во унынии укрепившая. Радуйся, убийцу обезумевшаго простившая; радуйся, мир и упокоении сыну испросившая. Радуйся, преблагая Иулиание, многомилостивая заступнице наша!


Кондак 5

Божией волею и другий сын твой смерть прия в служении ратнем. Ты же и сей крест понесе с песнию безропотною: Аллилуия.

Икос 5

Видяще супруг тя, от мира бежати ищущу, умоли не оставляти дом и детей пятерицу. Ты же смиренно любовию паки покры домашних твоих, рекших ти: Радуйся, таинства брака хранительнице; радуйся, супругу добрая помощнице. Радуйся, крепкая и терпеливая подвижнице; радуйся, страстей плотских победительнице. Радуйся, белую ризу души своея соблюдшая; радуйся, телесными подвиги черниц превозшедшая. Радуйся, преблагая Иулиание, многомилостивая заступнице наша!


Кондак 6

Проповедник тайного богостояния твоего явися сын Каллистрат: пощений, всенощных бдений и неусыпной хвалы: Аллилуия.

Икос 6

Возсия благодать в тебе, мати святая, и воспери тя, яко птицу легкую, к небу влекомую. Мы же, ленивии, ревности твоей дивяся, глаголем: Радуйся, ангельскою душею пламенеющая; радуйся, сладость райскую вкушающая. Радуйся, даром слезным обогащенная; радуйся, красотою псалмопений утешенная. Радуйся, тело твое храм Духа сотворшая; радуйся, сердце твое престол Троицы содеявшая. Радуйся, преблагая Иулиание, многомилостивая заступнице наша!


Кондак 7

Хотяще по смерти подружия твоего истее Христу прилепитися, новыми подвиги умиления слезы и сердце милостивое стяжала еси, на земли яко на небе поя: Аллилуия.

Икос 7

Новое знамение на тебе возсия, егда Пречистая от образа Своего святаго прорече, в Церковь Божию тя призывающе. Тем же о тебе веселящеся, поем: Радуйся, Христова любимице смиренная; радуйся, молитвеннице к Нему дерзновенная. Радуйся, милости паче жертвы почтившая; радуйся, церковь Божию не оставившая. Радуйся, от Богородицы славу приявшая; радуйся, яко заря нашу землю осиявшая. Радуйся, преблагая Иулиание, многомилостивая заступнице наша!


Кондак 8

Странно есть зрети, блаженная, егда великую милость от Пречистыя Девы улучивше, но и крест подъяла есть превеликий, да и в скорбех нас научиши пети: Аллилуия.

Икос 8

Промыслом неизследимым глад и нищета дом твой, милостивая, постиже. Но чадом и слугом твоим заповеда ничему чужду отнюдь касатися. Они же глаголаша ти: Радуйся, в тяжелоносней године всем утешение; радуйся, страждущим верное вспоможение. Радуйся, знамения грозные созерцавшая; радуйся, плачущим и скорбящим сострадавшая. Радуйся, верующим терпение подающая; радуйся, о прощении грешников молящаяся. Радуйся, преблагая Иулиание, многомилостивая заступнице наша!


Кондак 9

Всякое животно, благоволения исполнено, хвалит Всещедраго Бога. Но, угоднице крепкая, аще и земных благ лишися, николиже преста пети: Аллилуия.

Икос 9

Витий язык не может сказати томление твое, святая, егда хлеба не имуще, лебедою чад твоих питаше. Мы же силу терпения твоего почитаем тепле: Радуйся, многомятежие мира сего презревшая; радуйся, высоту Небеснаго Града вожделевшая. Радуйся, богатство во уметы вменившая; радуйся, со упованием крест свой понесшая. Радуйся, в воле Господни ходившая; радуйся, отраду вечную улучившая. Радуйся, преблагая Иулиание, многомилостивая заступнице наша!


Кондак 10

Спасти душу твою измлада хотяще, аще и яко Марфа ближним послужи, но духом Марии благую избра часть. Тем же Иисусу, желаний Краю, присно поеши: Аллилуия.

Икос 10

Стеною твердою житейским бурем противостояла еси, добродетелей же елеем старость свою умастила еси и в немощех сущи, слышиши утешения сии: Радуйся, тихое пристанище обретшая; радуйся, Небесный Чертог узревшая. Радуйся, Грозным Судиею не судимая; радуйся, святым женам сопричисленная. Радуйся, яко на орлих крылах воспарившая; радуйся, в бытие присносущное востекшая. Радуйся, преблагая Иулиание, многомилостивая заступнице наша!


Кондак 11

Пение небесное Ангел твой воспе над смертным ложем твоим, горлице Божия, егда ты, яко свеща, пламень последней молитвы Богови даде, за вся благодаря: Аллилуия.

Икос 11

Светом святым освятися и Духа Небеснаго прия в приобщении Христовых Животворящих Таин. И тако в тишине нетленное селение обрела еси, от уст тленных слышаще сия: Радуйся, образ смирения нам явившая; радуйся, молитвы зерцало нам бывшая. Радуйся, венцем славы от Христа увенчанная; радуйся, светлыми ризы от Ангелов покровенная. Радуйся, паче крин сельных благоухающая; радуйся, во мраце яко свеща горящая. Радуйся, преблагая Иулиание, многомилостивая заступнице наша!


Кондак 12

Благодатию Божиею осеняемии и тобою наставляемии чада твоя во благочестии и правде земную стезю проидоша. Но и о нас всех молися, купно с ними и тобою поющих: Аллилуия.

Икос 12

Поет тебе, жено святая, веселыя песни Христова Церковь, дивно обретши благоуханныя мощи твоя. Мы же, раку честную лобызающе, припеваем согласно: Радуйся, яко тобою радости исполнихомся; радуйся, яко тобою веселия сподобихомся. Радуйся, яко тобою благодати приобщихомся; радуйся, яко тобою на высокая вознесохомся. Радуйся, яко тобою в правоверии укрепихомся; радуйся, яко тобою в истине утвердихомся. Радуйся, преблагая Иулиание, многомилостивая заступнице наша!


Кондак 13

О милостивая мати, блаженная и праведная Иулиание! Милость и мир нам у Господа испроси, да вся дела благая наша в жертву чистую Творцу принесем и с тобою пение Троице сотворим: Аллилуия.

Сей кондак глаголется трижды.
Таже икос 1: Ангельскаго чина:
И кондак 1: Избранную Богом праведницу:




Имя:*
E-Mail:


Основан в 2008 году