От суеты житейская возникше и ума своего помыслы во едино собравше, ко Твоей, Богородице, иконе очи душ и телес наших воздвизаем, и Тебе взываем сице: не остави, Пречистая, нас немощных во гресех наших растлетися, не попусти злому демону души наша от Сына Твоего в дебри страстей отгнати, но помози нам Того заповеди присно памятовати, да ниже блудным возбешением себе предаем, ниже друг друга злобою угрызаем, но якоже днесь, святыни Твоей предстояще, о исправлении жития нашего ревностию распаляемся, тако и от храма Твоего в дома своя отшедше, сие доброе намерение сохранити потщимся.

По сих же и телесныя наша нужды утоли, и горести Твоею молитвою исцели, Всепетая. Вемы, яко подобаше нам паче вся сия благодушие претерпевати и точито о терпении в скорбех Господа просити; но понеже изнемогают в печалех души наша и помыслы уныния нашу колеблют веру, сего ради в сокрушении сердец к Тебе сице взываем: якоже безчисленныя болящия страдальцы исцелила ecu и скорбящия утешила ecu, тако и нас пред чудотворною Твоею иконою припадающих и в скорби Тебе молящихся услыши, и всех прошения во благое исполни, болящим здравие, скорбящим утешение подающи, во вражде сущим мир от Бога низпосылающи, сомнящимся же веры утверждение.

Услыши грешныя рабы Твоя, Пречистая, воздвигни нас на благодарственное Ти славословие, да умножится вера людей Твоих, да прославится в них Твое заступление, да тако Царствие Сына Твоего посреде нас утвердится, Емуже подобает всякая слава, честь и поклонение, со Безначальным Его Отцем и Пресвятым и Благим и Животворящим Духом, ныне и присно и во веки веков. Аминь.