Молитва святому преподобному и благоверному князю Олегу БрянскомуО преподобне отче, благоверне княже Олеже! Воззри, преблаженне, милостивно на дом (приход) сей и люди, в нем живущия, и не отвержи требующих твоея помощи, не презри нас, молящихся тебе, но помози нам (имена) скорым предстательством твоим, да всяких бед, напастей и скорбей в сей жизни временней избежавше, кончину непостыдну обрящем, и тако на земли богоугодно поживше, жизни райския на небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.
Молитва иная святому благоверному князю Олегу БрянскомуО, преподобне отче, благоверне княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неустанный! Воззри, преблаженне, милостиво на град твой и виждь чада твоя, смиренно ти припадающия и служити тебе хотящия. Не отвергни требующия твоея помощи, но яко благодетель и ходатай, моли присно Господа Бога и Спаса нашего Иисуса Христа, да благословит страну Российскую, в мире и благоверии ю сохраняя, грады умножая, достояние Свое соблюдая. Вознеси, богоносне отче наш, сие малое моление недостойных раб твоих Владыце Христу, да утвердит во Святей Православней Церкви живый дух правыя веры и любве, благочестие непоколебимо, любомудрие христопоследовательно, да дарует пастырям ревность попечения о спасении людей, во еже неверующая просветити, заблуждшия наставити, отпадшия обратити и привлещи. Изряднее же, да вся чада Церкве Православныя чисты сохранит от мирских искушений, похотей плотских, суемудрия, суеверий и наваждений вражеских. Ей, угодниче Божий, не презри нас, молящихся тебе, но помози нам скорым предстательством твоим, да всяких бед, напастей и скорбей в сей жизни временней избежавше, кончину непостыдну обретем, и тако на земли богоугодно поживше, жизни райския на небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.
ВеличаниеУблажаем тя, /
благоверне княже Олеже, /
и чтим святую память твою, /
ты бо молиши за нас /
Христа Бога нашего.
Тропарь Олегу Брянскому, благоверному князю, глас 8:От юности возлюбив Христа всем сердцем, преподобне /
славу земную, яко преходящу, оставил еси /
и царство земное в ничтоже вменивше, /
лику инок радостно причелся еси /
и труды многими град Брянск, аки солнце пресветло, озарил еси: /
тем, быв Троицы украшение, /
моли, княже Олеже, Христа Бога, спастися душам нашим.
Кондак преподобного и благоверного князя Олега Брянского, глас 4:Уподобился еси плодоносней леторасли от корене честнаго, Олеже благородне,/
истину возлюбив и нетленный Христов живот./
Темже молитвою, бдением и пощением светильник великий быв твоим учеником,/
просвети, блаженне, Отечество твое и спаси души наша.
День памяти: 3 октября (ст.ст. 20 сентября)