Святой источник
    Вход Регистрация
Специалист по обустройству родников, святых источников

Молитва ко преподобному отцу нашему Матфею, Яранскому чудотворцу

Автор: Плаксин Олег
Опубликовано: 5 апреля 2016 г. 09:51, посмотрело: 8749
Преподобные

Молитва ко преподобному отцу нашему Матфею, Яранскому чудотворцу

О, преподобне отче наш Матфее, Яранский чудотворче! От юности твоея всем сердцем Христа возлюбивый, исполненный духа премудрости и разума, духа веры и благочестия, невозвратным желанием Тому Единому последовал еси, сердцем смиренным все заповеди Господни исполняя. Ты приял еси образ Ангельского жития, неленостно подвизаяся в посте, бдении и молитве, восшел еси на высоту добродетелей, восприняв от Всещедраго Бога множество благодатных даров духовных. Дар прозорливости, дар недугов душевных и телесных врачевания, еще на земли обильно в тебе явися. Многим бысть добрый наставник и утешитель, пастырь и молитвенник. Во дни скорби и лютаго гонения от безбожных, во дни нестроения и смуты, ты, яко звезда светозарная в нощи, православным людям верный путь спасения озарил еси, пастырей в подвиге исповедничества и мученичества утверждая, монашествующих непреложно следовати заповедем Христовым научая, множество верных чад Церкви нашея утешая и вразумляя. Сам же гонения, скорби и болезни претерпев, ныне Отечества небеснаго достигл еси, по преставлении своем духом от нас не отлучаяся, сильно же благодатную помощь подавая всем с верою и любовию притекающим к тебе. Темже смиренно молим тя, преподобне отче наш Матфее, ныне, вкупе с преподобным Трифоном, блаженным Прокопием, Вятския земли чудотворцами и предстателями, и всеми святыми, вознеси своя благомощныя молитвы ко Христу, Спасу нашему, и испроси у Него веры православныя во Отечестве нашем утверждение, пастырям ревности, монашествующим в подвигах благих преуспеяния, всем Христианом благочестиваго и добродетельнаго жительства. Научи нас всею душею и сердцем любити и прославляти Пречестное и Великолепое и Сладчайшее Имя Господа нашего Иисуса Христа, Егоже и ты возлюбил еси, непрестанно во устех и в сердце Его имея. Да и мы прославим жизнию нашею Отца, и Сына, и Святаго Духа, ныне и присно, и во веки веков. Аминь.



Молитва иная

О, Божественныя Благодати добрый и красный сосуде, преподобне отче Матфее! К тебе мы грешнии и смирении молитвенно прибегаем и из глубины сердца взываем: призри на ны и умоли Человеколюбца Бога, да не осудит нас по беззаконием нашим, но да сотворит с нами по велицей своей милости. Сохрани нас своим заступлением от облежащаго ны суемудрия и неправоверия и яко пастырь добрый упаси заблуждшия овцы стада Христова и во дворы Господни сия всели. Огради нас от соблазнов, ересей и расколов и настави твердо в вере православней подвизатися. Сохрани землю Вятскую и вся веси и грады российския невредимы от всякаго зла. Умоли Господа, да ниспослет нам тихое и богоугодное житие, уврачует своею благостию наша болезни душевныя и телесныя, согреет сердца наша любовию друг ко другу и сотворит ны братолюбны и единомысленны. Призри на всех с верою к тебе притекающих и просящих у тебе великия и богатыя милости. Да сподобит Господь честно празднующих святую память твою грехов оставления, дабы и мы вси с тобою прославляли всесвятое имя Отца, и Сына, и Святаго Духа, ныне и присно, и во веки веков. Аминь.



Тропарь
глас 1

От юности твоея Христа возлюбивый/
и всею душею Его взыскавый,/
заповеди Божии неленостно соблюдый:/
постом, молитвою и смирением милость Господню обретый;/
стяжал еси благодать исцелений, отче преподобие Матфее;/
темже добрый утешитель был еси к тебе притекающим с верою;/
ныне Христу дерзновенно молися:/
о граде Яранске и людех земли Вятския,/
даровати нам веры отеческия утверждение/
и душам нашим спасение.



Кондак
глас 8

Чистотою жития твоего Господу угодил еси,/
дар непрестанныя молитвы стяжал еси,/
избранниче Божий, преподобие Матфее, Яранскии чудотворче;/
мы же, чтуще святую память твою,/
с любовию вопием ти:/
моли Христа Бога спастися душам нашим.





Основан в 2008 году