Святый и великий Архангеле Божий Михаиле, неисповедимыя и пресущественныя Троицы первый во Ангелех предстоятелю, рода же человеческаго приставниче и хранителю, сокрушивый с воинствы своими главу прегордаго Денницы на небеси и посрамляяй выну злобу и коварства его на земли! К тебе прибегаем с верою и тебе молимся с любовию: буди щит несокрушим и забрало твердо Святей Церкви и Православному Отечествию нашему, ограждая их молниеносным мечем твоим от всех враг, видимых и невидимых. Не остави же, о Архангеле Божий, помощию и заступлением твоим и нас, прославляющих днесь святое имя твое: се бо, аще и многогрешни есмы, обаче не хощем в беззакониих наших погибнути, но еже обратитися ко Господу и оживленным быти от Него на дела благая. Озари убо ум наш светом лица Божия, иже выну сияет на молниевиднем челе твоем, да возможем разумети, что есть воля Божия о нас, благая и совершенная, и ведети вся, яже подобает нам творити и яже презирати и оставляти. Укрепи благодатию Господнею слабую волю и немощное произволение наше, да, утвердившеся в законе Господнем, престанем прочее влаятися земными помыслы и похотении плоти, увлекающеся по подобию несмысленных детей скорогибнущими красотами мира сего, яко ради тленнаго и земнаго безумне забывати вечная и небесная. Над всеми же сими испроси нам свыше дух истиннаго покаяния, нелицемерную печаль по Бозе и сокрушение о гресех наших, да остающее нам число дний временнаго живота нашего иждивем не во угождении чувств и работе страстем нашим, но во изглаждении зол, содеянных нами, слезами веры и сокрушения сердечнаго, подвигами чистоты и святыми делами милосердия. Егда же приблизится час окончания нашего, освобождения от уз бреннаго сего телесе, не остави нас. Архангеле Божий, беззащитных противу духов злобы поднебесных, обыкших преграждати душе человечестей восход в горняя, да, охраняеми тобою, безпреткновенне достигнем оных преславных селений райских, идеже несть печаль, ни воздыхание, но жизнь безконечная, и, сподобльшеся узрети пресветлое лице Всеблагаго Господа и Владыки нашего, падше со слезами у ног Его, в радости и умилении воскликнем: слава Тебе, дражайший Искупителю наш, Иже за премногую любовь Твою к нам, недостойным, благоволил еси послати Ангелы Твоя в служение спасению нашему! Аминь.
Слушать аудио mp3 молитву Архангелу Михаилу
Молитва вторая
Великий архистратиже Божий, Михаиле, победитель демонов, победи и сокруши всех врагов моих видимых и невидимых. И умоли Господа Вседержителя, да спасет и сохранит меня Господь от всех скорбей и от всякой болезни, от смертоносной язвы и от напрасной смерти, о, великий архангеле Михаиле, ныне и присно и во веки веков. Аминь
Молитва третья
Господи, Боже великий, Царю безначальный, посли Архангела Твоего Михаила на помощь рабам Твоим (имя рек). Защити, Архангеле, нас от всяких врагов, видимых и невидимых. О, Господень великий Архангеле Михаиле, демонов сокрушителю, запрети всем врагом, борющимся со мною, и сотвори их яко овцы, и смири их злобные сердца, и сокруши их, яко прах перед лицем ветра. О, Господень великий Архангеле Михаиле, шестикрылый первый княже и воеводо Небесных Сил, Херувимов и Серафимов, буди нам помощник во всех бедах, скорбях, в печалех, в пустыни и на морях тихое пристанище. О, Господень великий Архангеле Михаиле, избави нас от всякия прелести диавольския, егда услышишь нас, грешных, молящихся Тебе, и призывающих имя твое святое. Ускори нам на помощь и побори всех, противящихся нам, силою Честнаго и Животворящего Креста Господня, молитвами Пресвятыя Богородицы, молитвами святых апостолов, святителя чудотворца Николая, Андрея, Христа ради, юродиваго, святаго пророка Илии и всех святых великомучеников, святых мучеников Никиты и Евстафия и всех преподобных отцов наших, от века Богу угодивших и всех святых Небесных Сил. О, Господень великий Архангеле Михаиле, помози нам, грешным (имя рек), и избави нас от труса, потопа, огня, меча и напрасныя смерти, от великаго зла, от врага льстиваго, от бури наносимой, от лукаваго избави нас всегда, ныне и присно, и во веки веков, аминь. Святый Архистратиже Божий Михаиле, молниеносным мечем Твоим отжени от мене духа лукаваго, искушающего и томящего мя. Аминь.
Молитва четвертая
Господи Боже великий Царю, Безначальный, посли, Господи, Архангела Твоего Михаила на помощь рабу Твоему (имя рек) изъяти мя от враг моих видимых и невидимых. О, Господень Михаиле Архангеле, демонов сокрушителю: запрети всем врагам борющимся со мною, сотвори их, яко овцы и сокруши их, яко прах пред лицем ветра. О, Господень великий Архангеле Михаиле, шестокрылатый первый княже, воеводо Небесных сил Херувим и Серафим. О, угодный Михаиле Архангеле, буди ми помощник во всех делех, в скорбях, печалех, в пустынях, на распутиях, на реках и на морях – тихое пристанище. Избави мя, великий Михаиле Архангеле, от всяких прелестей диавольских, егда услышиши мя, грешнаго раба своего (имя рек), молящегося тебе и призывающаго имя твое святое, ускори на помощь мне и услыши молитву мою.
О, великий Архангеле Михаиле, победи вся противящияся мне силою Честнаго и Животворящаго Небеснаго Креста Господня, молитвами Пресвятыя Богородицы и святых апостолов, святаго пророка Божия Илии, святителя Николая чудотворца, святаго Андрея юродиваго, святых великомучеников Никиты и Евстафия, преподобных отец и святых святителей, мучеников и всех святых Небесных сил. Аминь.
Молитва пятая
О святый Михаиле Архангеле, светлообразный и грозный Небеснаго Царя воеводо, прежде Страшнаго Суда ослаби ми покаятися от грехов моих, от сети ловящих избави душу мою и приведи ю к сотворшему ю Богу, седящему на Херувимех, и молися о ней прилежно, да твоим ходатайством послет ю в место покойное. О грозный воеводо Небесных Сил, предстателю всех у Престола Владыки Христа, хранителю твердый всем человеком и мудрый оружниче, крепкий воеводо Небеснаго Царя, помилуй мя, грешнаго, требующаго твоего заступления, сохрани мя от всех видимых и невидимых враг, паче же подкрепи от ужаса смертнаго и от смущения диавольскаго и сподоби мя непостыдно предстати Создателю нашему в час страшнаго и праведнаго Суда Его. О всесвятый великий Михаиле Архистратиже, не презри мене, грешнаго, молящагося тебе о помощи и заступлении твоем, в веце сем и в будущем, но сподоби мя тамо купно с тобою славити Отца и Сына и Святаго Духа во веки веков. Аминь.
Молитва шестая
О святый Михаиле Архангеле, помилуй нас, грешных, требующих твоего заступления, сохрани нас, раб Божьих (имена), от всех видимых и невидимых враг, паче же подкрепи от ужаса смертного и от смущения диавольскаго и сподоби нас непостыдно предстати Создателю нашему в час страшного и праведного Суда Его. О всесвятый, великий Михаиле Архистратиже! Не презри нас, грешных, молящихся тебе о помощи и заступлении твоем в веце сем и в будущем, но сподоби нас тамо купно с тобою славити Отца и Сына и Святаго Духа во веки веков. Аминь
Молитва седьмая
О Господи Боже Великий, Царю Безначальный, пошли, Господи, Архангела Твоего Михаила на помощь рабу Cвоему (имя рек) изъяти мя от враг моих видимых и невидимых! О Господень Архангеле Михаиле, излей миро благостыни на раба своего (имя рек). О Господень Михаиле Архангеле, демонов сокрушителю! Запрети всем врагам, борющимся со мною, сотвори их яко овцы и сокруши их, яко прах пред лицем ветра. О Господень Великий Михаиле Архангеле, шестокрылатых первый Княже и Воеводо Небесных Сил, Херувим и Серафим! О чудный Архангеле Михаиле! Хранителю неизреченный, буди ми помощь во всем, в обидах, в скорбех, в печалех, в пустынях, на распутиях, на реках и на морях тихое пристанище! Избави мя, Великий Михаиле Архангеле, от всякия прелести диавольския, егда услышиши мя, грешнаго раба своего (имя рек), молящагося тебе и призывающаго имя твое святое, ускори на помощь мне и услыши молитву мою. О великий Архангеле Михаиле! Победи вся противящиеся мне силою Честнаго и Живо-творящаго Креста Господня, молитвами Пресвятыя Богородицы и всех Ангел и святых Апостол, и святаго Николая Чудотворца, святаго Андрея юродиваго и святаго пророка Илии, и святых великомученик Никиты и Евстафия, преподобных отец и святителей и мученик и всех Святых Небесных Сил. Аминь.
Кто читает сию молитву каждодневно, не прикасается к нему ни диавол, ни злой человек, и лестию не соблазнится сердце его. По преданию, сия молитва написана на паперти обители Архангела Михаила в Москве - еже именуется "Чудов Монастырь" - 11 августа 1906 г. Молись под праздник Архангела Михаила, под 19 сентября (Чудо в Хонех) и под 21 ноября (н. ст.) - его память, т. е. под Михайлов день, - молись в 12 часов ночи. Молись под эти ночи, и он услышит молитву просящего, называй усопших по имени и проси, чтобы он вывел их из ада. Помяни родных и близких, называй их имена.
Тропарь Архангелу Михаилу и всем Небесным силам безплотным, глас 4:
Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно и вопиющия: от бед избавите ны, яко чиноначальницы вышних сил.
Слушать аудио mp3 Тропарь и Кондак Архангелу Михаилу
Кондак, глас 2-й:
Архистратизи Божии, служителие Божественным славы, Ангелов начальниче, и человеков наставницы полезное нам проси и велию милость, яко безплотных Архистратизи.
Величание
Величаем вас Архангели и Ангели и вся воинства, Херувими и Серафими, славящия Господа.
Слушать аудио mp3 Величание Архангелу Михаилу
Ино величание
Величаем тя, святый архангеле Христов Михаиле, и вас, святии ангели, архангели, начала, власти, силы, господствия, престоли, херувими, серафими, прославляющих Господа. (Из Часослова, изданного в 1742 году в Киево-Печерской лавре.)
Псалом Архангелу Михаилу
Небесного Чертога житель, Архистратиже бесплотных сил, Царя Небесного служитель Архангел Божий Михаил!
Во дни житейской грозной битвы, во дни гоненья и скорбей Возносим мы к тебе молитвы и просим помощи твоей.
Покрой нас славой неземною, сияньем дивной красоты, Сойди бесшумною стопою с лазурной неба высоты.
И властью Богом тебе данной, главу ты змия порази И водвари ты мир желанный, любовь святую воскреси.
Развей неверья тьму ночную, дорогу к правде укажи. И веру чистую, святую, в сердца холодные вложи.
Услыши нас небесный житель, Архистратиг бесплотных сил Врага и злобы победитель, Архангел Божий Михаил!