Тропарь
глас 4
Яко светозарная звезда /
возсиял еси в пределех земли Костромския, /
преподобне отче наш Тимоне, /
последуя завету преподобнаго Серафима Саровскаго, /
в Надеевской пустыни подвигом бдения, пощения и молитвы подвизался еси, /
многия иноки и в миру сущия ко Христу привел еси, /
ныне со святыми у Престола Божия пребываеши. /
Молися Христу Жизнодавцу /
о всех, с верою имя твое призывающих.
Кондак
глас 3
Преподобне отче Тимоне, / земли Костромския похвало и украшение, / от юности Христа Бога возлюбил еси, / Евангельски шествовав путем земным, / Небеснаго Отечества сподобился еси. / Ныне же моли Всемилостиваго Господа / спастися душам нашим.
Величание
Ублажаем тя, преподобне отче наш Тимоне, и чтим святую память твою, наставниче монахов и собеседниче ангелов.
Преподобне отче наш Тимоне, моли Бога о нас!